Алмамбет Шыкмаматов Мамлекеттик салык кызматына жетекчи болду
6-декабрда Улуттук коопсуздук боюнча мамлекеттик комитет (УКМК) Мамлекеттик салык кызматынын ошол кездеги төрагасы Алтынбек Абдувапов жана анын орун басары Исламбек Кыдыргычов кармалганын билдирген. УКМК аларга байланыштуу коррупция жана кызмат абалынан кыянаттык менен пайдалануу фактылары боюнча козголгон кылмыш ишин иликтөө уланып жатканын кошумчалаган. Ошол күнү Биринчи май райондук соту Абдуваповду жана Кыдыргычовду 20-январга чейин камакка алган.
УКМКнын төрагасы Камчыбек Ташиев 17-декабрда Мамлекеттик салык кызматындагы мыйзамсыз иштерден бюджетке 30 млрд сомдун тегерегинде салык төлөнбөй калганын билдирген.
Президент Садыр Жапаров 18-декабрда Жогорку Кеңеште сүйлөп жатып, Акылбек Жапаров салык системасындагы алешемдиктер үчүн кызматтан кеткенин тактады.
55 жаштагы Алмамбет Шыкмаматов буга чейин президенттин кеңешчиси болуп турган. 2023-жылы сентябрда Мамлекеттик ипотекалык компаниянын жетекчиси болуп дайындалып, быйыл июнда бошотулган.
Ага чейин “Бишкек” эркин экономикалык аймагынын жетекчиси болуп иштеген. 2021-жылы Инвестицияларды илгерилетүү жана коргоо боюнча агенттиктин жетекчиси да болуп эмгектенген. Кийин бул кызматын тапшырып, ошол эле жылдын ноябрь айында өткөн парламенттик шайлоого “Ынтымак” партиясынан талапкер болгон. 2021-жылкы президенттик шайлоодо Садыр Жапаровдун Нарын облусундагы штабын жетектеген.
2015-2020-жылдары Жогорку Кеңеште “Ата Мекен” фракциясынан депутат болуп, 2011-2015-жылдары юстиция министринин кызматын аркалаган. (TAb)