Дамасктын жанында адам сөөгү жапырт көмүлгөн жайлар табылды
Бул тууралуу 18-декабрда Рейтер агенттигине согуш кылмыштарын иликтөө менен алектенген АКШнын өзгөчө тапшырмалар боюнча мурдагы элчиси Стивен Рапп билдирди.
Рапп бул тууралуу Дамасктын чет жакасындагы Кутайфа жана Нажхи аймактарындагы адам сөөктөрү жапырт көмүлгөн жайларга барып келгенден кийин айтты.
Баш кеңсеси АКШда жайгашкан "Өзгөчө кырдаалдар боюнча Сирия ыкчам тобу" уюмунун жетекчиси, укук коргоочу Муаз Мустафа кошумчалагандай, Кутайфа деген аймакта эле миңдеген кишинин сөөгү жашырылган.
Гаагадагы дайынсыз жоголгондор боюнча эл аралык комиссия Сирияда адам сөөктөрү жапырт көмүлгөн 66 жай бар экенин маалымдаган.
Бул комиссиянын билдирүүсүнө караганда, Асад бийлик жүргүзүп турган мезгил аралыгында 157 миң киши дайынсыз жоголгон.
Кутайфа менен Нажхинин тургундарынын айтымында, бульдозерлер менен казылган аңдарга жүк ташуучу машинелер менен сөөктөрдү алып келип, ыргытып турушкан.
Спутниктен алынган кадрлардан Кутайфада мындай иштер 2012-жылдан 2022-жылга чейин уланганын көрүүгө болот.
Сирияны 25 жылдай башкарган Башар Асад 8-декабрда козголоңчу күчтөрдүн чабуулунун жыйынтыгында бийлигин таштап, өлкөдөн качууга аргасыз болгон. Орусиядан баш паанек алган Асад бийликте турган маалда адам укуктары кескин тебеленгени тууралуу дооматтарды четке кагып келген.