Орусиянын Мамлекеттик Думасы 17-декабрда тиги же бул топту соттун чечими менен террордук уюмдардын тизмесинен чыгарууну караган мыйзам кабыл алды.
Ага ылайык, уюм эгерде "террорчулукту актоого, колдоого же пропагандалоого багытталган ишмердүүлүгүн токтотсо, аны террордук топтордун тизмесинен чыгарса болот".
Тиешелүү чечимди башкы прокурордун же анын орун басарынын арызынын негизинде сот кабыл алышы керек.
Серепчилердин айтымында, бул мыйзам Орусиянын бийлигинин "Талибан" кыймылын террорчул уюмдардын тизмесинен чыгаруу планына байланыштуу кабыл алынды.
Аны жети сенатор жана беш депутат сунуштаган.
2021-жылы, август айында талибдер Ооганстандагы бийликти басып алышкан. Батыш мамлекеттери "Талибан" кыймылын Ооганстандын расмий бийлиги катары тааный элек. Орусияда бул уюм террордук уюмдардын тизмесинде болгонуна карабастан Кремлдин өкүлдөрү Москвада бир нече ирет талибдер менен жолугушкан. Ал эми 25-ноябрда Кабулга Орусиянын Коопсуздук кеңешинин катчысы Сергей Шойгу барды.
Кыргызстан “Талибан” кыймылын террордук уюмдардын тизмесинен чыгарганын 6-сентябрда Тышкы иштер министрлиги билдирген. Андан мурда Казакстан “Талибанды” өлкөнүн террорчул уюмдар тизмесинен чийген.
