Казанда имам-вәгазьчеләр слёты ачылды
16 декабрьдә Татарстан мөфтие Камил хәзрәт Сәмигуллинның хәер-фатыйхасы белән Татарстан мөхтәсибәтләрендә халыкны ислам диненә өндәү белән шөгыльләнүче имам-вәгазьчеләр слёты ачылышы узды. 4 көн дәвамында алар җәмгыятьтә ислам кыйммәтләрен тарату һәм ислам нигезләре турында белемнәрне арттыру өлкәсендәге актуаль мәсьәләләр хакында фикер алышачак. Бу хакта ТР Диния нәзарәте матбугат хезмәте хәбәр итә.
Әлеге чарага Татарстанның төрле почмакларыннан 35 яшькә кадәрге аеруча актив имамнар килде. Аларның бурычы – нәзарәтнең халыкка, бигрәк тә яшьләргә рухи ярдәм һәм дини-әхлакый тәрбия бирү, исламга кызыксынуны арттыру һәм республика мәчетләренә җәлеп итү өлкәсендәге эшен бергәләп ныгыту. Тулаем алганда, бу слёт вәгазьләү эшчәнлеге белән шөгыльләнүче имамнар әзерләүгә юнәлдерелгән.
Слёт үз эшен Казан янындагы «Заречье» үзәгендә дәвам итәчәк. Катнашучыларны төрле тренинглар, дәресләр, лекцияләр һәм дискуссияләр көтә. Татарстанның төрле районнарыннан килгән хәзрәтләр бер-берсе белән таныша, планлаштыруның, максатлар куюның, бурычлар билгеләүнең, эш программасы булдыруның, ресурсларны ачыклауның, эшне контрольдә тотуның һәм нәтиҗәләрне бәяләүнең яңа методикаларын өйрәнә алачак.