Казакстанда эгемендик күнүн утурлай Желтоксон, Жаңы-Өзөн, Январь окуяларын эскерген баракчалар пайда болду
Кызыл түстөгү баракчаларга "Унутпайбыз, кечирбейбиз" деп жазылган.
"Азаттыктын" казак редакциясы жазгандай, видеолордун биринде президент Касым-Жомарт Токаевдин сүрөтү тартылган билбордго "акыйкаттыкты талап кылабыз" деген баракчаны чаптап жатышканын көрүүгө болот.
Кыймылдын сайтындагы видеодо кара кийимчен киши "Желтоксон 1986, Жаңыөзөн 2011, Қаңтар 2022" деп жазылган плакатты кармап турат.
"Азаттыктын" казак редакциясы президенттин Эгемендик күнүнө арналган куттуктоосунда ал кайгылуу үч окуя тууралуу айтылбаганын белгилешти.
1986-жылы 16-19-декабрь күндөрү Алматынын борбордук аянтына миңдеген казак жаштары чогулуп, ошол кездеги советтик Казакстандын башчысы Динмухаммед Кунаевдин ордуна мурда өлкөдө иштебеген Геннадий Колбиндин дайындалышына каршылык билдирип чыккан.
Бул акция күч менен таратылып, кийин куугунтук менен коштолгон. Желтоксон окуясында канча адам өлгөнү так белгисиз.
2011-жылы 16-декабрда Жаңы-Өзөн шаарындагы мунайчылардын бир нече айлык иш таштоосу кан төгүү менен коштолгон. Тынч митингдин катышуучуларына каршы ок атышканда, расмий маалымат боюнча, 17 киши курман болгон. Жергиликтүү тургундар каза тапкандар андан көп дешет.
2022-жылы январда кошуна өлкөдө газдын кымбатташына каршы митингдер бийликтин кызматтан кетишин талап кылган массалык акцияларга айланып, тоз-тополоң менен коштолгон.
Расмий эсеп боюнча 238 киши набыт болгон. Алардын алтоо кармалгандан кийин кыйноолордон улам көз жумган. Бир нече миң киши кармалып, жүздөгөнү ыдык көргөнүнө арызданган. Бирок мындай фактыларга байланыштуу козголгон кылмыш иштердин көбү токтотулган.