Парламентот на Јужна Кореја во саботата гласаше за отповикување и недоверба на претседателот Јун Сук Јеол, гласајќи да го суспендира од службените должности поради неговиот обид минатата недела да воведе вонредна состојба, пренесува Ројтерс.
Од 300 пратеници, дури 204 пратеници гласаа за импичмент на претседателот, при што 85 пратеници гласаа против, тројца беа воздржани и четворица неважечки.
Тоа значи дека Јун веднаш ќе биде суспендиран од функцијата, а премиерот ќе стане вршител на должноста, а оваа одлука на парламентот мора да ја потврди и Уставниот суд.
Целиот процес на импичмент би можел да потрае со недели, бидејќи допрва треба да се одржи судење пред Уставниот суд. Ако шест од деветчлениот совет гласаат за поддршка на импичментот, само тогаш претседателот ќе биде сменет.
Во ова сценарио, изборите за следниот претседател ќе бидат распишани во рок од 60 дена од пресудата, што може да ја втурне земјата во нов круг на политичка криза.
Претходно, полицијата во Сеул соопшти дека очекува најмалку 200.000 луѓе да присуствуваат на масовните демонстрации во јужнокорејската престолнина во сабота пред второто гласање за импичмент на неуспешниот обид на претседателот Јун Сук Јеол да воведе воена состојба.
Десничарскиот претседател вети дека ќе се бори и покрај намалената поддршка од јавноста.
Илјадници луѓе излегоа на улиците на главниот град на Јужна Кореја во саботата на ривалски митинзи за и против претседателот Јун Сук Јеол, неколку часа пред гласањето за импичмент.
Протестите со кои се бара оставка на Јун започнаа пред Националното собрание една недела откако не успеа првиот обид за смена на Јун во вонредна состојба.
На другата страна на Сеул во близина на плоштадот Гвангвамун, илјадници други се собраа во поддршка на Јун, свиреа патриотски песни и веејќи јужнокорејски и американски знамиња. „Јун немаше друг избор освен да прогласи вонредна состојба. Ја одобрувам секоја одлука што ја донел како претседател“, изјави за АФП поддржувачот Чои Хи-Сун.
Главната опозициска Демократска партија во саботата изјави дека гласањето за импичмент е „единствениот начин“ да се „зачуваат Уставот, владеењето на правото, демократијата и иднината на Јужна Кореја“.
Судот има 180 дена да донесе одлука за иднината на Јун.
Импичментот дојде откако некои членови на Партијата на народната моќ на Јун им се придружија на опозициските партии, кои контролираат 192 места во 300-членото Национално собрание, минувајќи го прагот од две третини потребни за импичмент.
Иако е суспендиран, Јун останува на функцијата, а Уставниот суд ќе одлучи дали ќе го смени во следните шест месеци. Доколку биде сменет од функцијата, ќе бидат распишани вонредни избори.
Јун стана вториот претседател во историјата на Јужна Кореја кој беше успешно отповикан.
