Бурят журналисі Евгения Балтатарова Франциядан саяси баспана алды
Журналист әрі белсенді Евгения Балтатарова 2022 жылдың наурызында Ресейден қысым көріп, Қазақстанға өтіп кеткен. 2022 жылдың наурызынан 2024 жылдың басына дейін Астанада тұрған Балтатароваға Қазақстан билігі босқын мәртебесін берген жоқ. Ол шешімді сотқа бергенмен өтініші сол күйі орындалмады. Қазақстанда бірнеше рет ұсталып, қайта босатылған. 2024 жылы қаңтарда оның Францияға кеткені белгілі болды.
Ресей армиясы туралы «фейк» ақпарат таратты деп айыпталған оған халықаралық іздеу жарияланған. Журналистің өзі Ресей құқық қорғау органдары "сыныққа сылтау іздеп", қылмыстық іс қозғауға түрткі болатын жайт табуға тырысқанын айтқан.
2022 жылы қазанда Ресей әділет министрлігі Балтатарованы "шетел агенті" деп танып, жеке тұлғалар тізіміне енгізген. Sota-ның жазуынша, 2024 жылдың мамыр айында "Сота" жобасына қатысушы ретінде екінші рет тізімге енгізілген. "Шетел агенті" ретінде заң міндеттемелерін орындамағаны үшін оған тағы бір қылмыстық іс қозғалған.
Францияда ол босқын мәртебесін шамамен бір жыл бойы күткен.
Қазақстан соғысты сынаған ресейлік белсенділерге көп жағдайда босқын мәртебесін бермейді. Олардың кейбірін Ресейдің күштік құрылымдары Қазақстан аумағында ұстап әкеткені белгілі болған. Кейбірі үшінші елге кете алған.