د نجونو پر زدکړو بندیز ملګري ملتونه د افغانستان د روغتیايي نظام د راتلونکي په اړه اندېښمن کړي
د ملګرو ملتونو د عمومي منشي د بشري او بیړنیو چارو مرستیال ټام فلېچر د ډېسېمبر پر ۱۲مه، د افغانستان پر وضعیت د امنیت شورا غونډې ته وویل چې د طالبانو د دې اقدام له وجې د مور و ماشوم د مړینې کچ لا زیاتېدای شي.
دا په داسې حال کې ده چې د طالبانو مشر ملا هبت الله اخوندزاده د روانې ډېسېمبر میاشتې په پیل کې په طبي انسټېټیوټونو کې د نجونو پر زدکړو بندیز ولګاوه.
د افغانستان لپاره د ملګرو ملتونو ځانګړې استازې او د مرستندویه ماموریت یا یوناما مشرې روزا اوتنبایېوا هم د امنیت شورا غونډې ته وویل چې د طالبانو د پرېکړې بشپړ عملي کېدل د نجونو او ښځو په ګډون د ټولو افغانانو لپاره مرګونې پایلې لرلای شي ځکه چې دا کار روغتیايي نظام زیانمنوي.
نوموړې زیاته کړه چې پر طالب چارواکو یې ټینګار کړی چې دې پرېکړې ته دې بیاکتنه وکړي. طالبانو لا د امنیت شورا په غونډه کې د شوي بحث په غبرګون کې څه نه دي ویلي خو د هغوی حکومتي ویاند ذبیح الله مجاهد په وروستیو کې ویلي ول چې د هغوی د استازو له ګډون پرته د ملګرو ملتونو غونډې بې ګټې دي.
طالبانو په ۲۰۲۱ز کال کې پر افغانستان له واکمنېدو راهیسې د نجونو او ښځو پر تعلیم او کار بندیزونو او محدودیتونو ته دوام ورکړی. هغوی په بیا بیا ویلي چې د نجونو د زدکړو لپاره تګلاره او مناسب چاپېریال چمتو کوي خو دا نه روښانوي چې په دې برخه کې څومره پرمختګ شوی دی.