Аксубайда районы советында имамнар район Башкарма комитеты җитәкчесе Алмаз Мингулов белән очрашты. Утырыш Татарстан Рәисе хакимияте вәкиле катнашында узды. Утырыш эшен ТР мөфтиенең мөхтәсибәтләр белән эшләү буенча урынбасары, көньяк төбәге казые, Аксубай районы имам-мөхтәсибе Равил хәзрәт Зөфәров алып барды. Бу хакта «Авыл таңнары» сайтында хәбәр ителә.
Катнашучылар мөхтәсибәт эшчәнлеге буенча мөһим мәсьәләләр турында фикер алышты. Шуларның иң мөһиме – район территориясендә экстремизмга юл куймау, яшьләргә рухи-әхлакый тәрбия бирү. Утырышта билгеләп үтелгәнчә, карашлары чын мөселман диненә туры килми торган читтән килүчеләргә карата уяулык күрсәтергә кирәк.
Утырышта катнашучылар Татарстан Республикасы мөселманнары Диния нәзарәтенең мөфтие һәм казый (шәригать судьясы) сайлау буенча IХ корылтайга (имамнар җыелышына) делегатларны билгеләде. Имамнар игътибарына коммерцияле булмаган оешма бәйгесендә катнашу турындагы мәгълүмат җиткерелде.
Катнашучылар эш тәҗрибәсе белән уртаклашты, һәр көнне очрашырга туры килгән актуаль мәсьәләләрне күтәрделәр.
Бу мәсьәләләр буенча бердәм эшчәнлек юнәлешләрен һәм проблемалы хәлләрне чишү юлларын билгеләделәр. Иң актив дин әһелләре бүләкләргә лаек булды.
