Миңгол Галиев: Бүгенге көндә безнең сәнгать күңел ачуга гына кайтып кала
10 декабрь көнне Филология һәм мәдәниятара багланышлар институтының Г.Тукай исемендәге Милли мәдәният һәм мәгариф югары мәктәбендә Татарстанның халык артисты Миңгол Галиев студентлар белән очрашты.
«Миңгол Галиев Татарстанның халык артисты гына түгел, ә күп еллар дәвамында безнең университетта студентларны музыка белеменә, җырларга өйрәткән профессорда да. Ул тәрбияләп чыгарган укучылар – Татарстанның халык артистлары Рөстәм Закиров, Айдар Галимов, Рәсим Низамов һәм башкалар», - диде Г.Тукай исемендәге Милли мәдәният һәм мәгариф югары мәктәбенең деканы Рамил Мирзаһитов.
Ул студентларга үзенең иҗат юлы ничек башлануы, студент чагындагы кызыклы хатирәләре, белем биргән мөгаллимнәре турында сөйләде һәм хәзерге җыр сәнгате турындагы фикерләре белән бүлеште.
«Бүгенге көндә безнең сәнгать күңел ачуга гына кайтып кала. Гадәттә, шагыйрь үзенең йөрәгеннән чыкканын яза, композитор күңеленнән алып, моң өсти, ә җырчы шул ике кешенең йөрәген халыкка җиткерергә тиеш. Әмма бүгенге көндә сәхнәгә чыккач, артистлар үзләрен күрсәтә башлыйлар», - диде Миңгол Галиев хәзерге җыр сәнгате турында.
Артист, Тукай күзаллаганча мәктәп булдырып, җыр башкарудагы методикасын, тәҗрибәсен тапшыру максатыннан студентларны үзенә укырга да чакырды.
«Япониядә чыгыш ясаганда, миңа «Сез авызыгызны да ачмыйсыз кебек, әмма тавышыгыз бик моңлы, яңгырап чыга», диделәр. Мин: «Безнең халыкның гореф-гадәтләре буенча, моңны, җырның мәгънәсен җиткерү өчен, авызны киң итеп ачу мәҗбүри түгел, җыр күңел түреннән чыгарга тиеш», - дидем. Миңа укырга килсәгез, мин сезнең барыгызны да җырчы итә алам», - диде Миңгол Галиев.
Студентлар артист белән бергә, тавыш ярыларын ныгытү өчен, күнегүләр дә ясадылар һәм, бергәләшеп, «Туган тел» җырын башкардылар.