11 декабрьдә Казанда «Татарстанда товар җитештерүчеләр арасында хәләл стандартларын кертү» темасына түгәрәк өстәл, шулай ук җитештерүләрдә Хәләл стандарты кертү буенча практик семинар булды.
Чараларны Татарстан Республикасы Сәүдә-сәнәгать палатасы ярдәмендә Татарстан Республикасы мөселманнары Диния нәзарәтенең «Хәләл» стандарты комитеты оештырды. Аларда Татарстан Республикасы Авыл хуҗалыгы һәм азык-төлек министрлыгы һәм Татарстан Республикасы Сәнәгать һәм сәүдә министрлыгы вәкилләре, шулай ук Татарстан Республикасының Инвестицион үсеш агентлыгы, муниципаль берәмлекләрнең башкарма органнары, җәмәгать туклануы предприятиеләре, эре эшкәртү предприятиеләре һәм эксперт җәмәгатьчелеге вәкилләре катнашты.
Диния нәзарәте хәбәр иткәнчә, түгәрәк өстәлдә түгәрәк өстәлдә Хәләл стандартлары буенча продукция җитештерү өлкәсендә бизнес өчен чишелешләр эшләү; Татарстан муниципаль берәмлекләрендә хәләл стандартларны кертүгә йогынты ясый торган факторлар; хәләл индустрия проблемаларының фәнни аспектлары һәм хәләл продукция экспортерларына ярдәм итү чаралары турында фикер алыштылар.
Очрашуда Татарстан Диния нәзарәтенең «Хәләл» стандарты комитеты рәисе Аббас хәзрәт Шляпошников мөһим белдерү ясады: 2024 елның ноябрендә Татарстан мөселманнары Диния нәзарәтенең Хәләл стандарты комитеты Фарсы култыгы илләрендә, шул исәптән Согуд Гарәбстанында, Кувейт, Бәхрәйн, Катар, Оман һәм Берләшкән Гарәп Әмирлекләрендә аккредитация алды. Хәзер гомуми аккредитациядән соң бу илләрнең һәрберсендә өстәмә раслау узарга кирәк, бу нотификацияләү процессы дип атала.
«Без инде берничә дәүләттә нотификацияләү процессын уңышлы уздык һәм Әмирлекләрдә һәм Согуд Гарәбстанында эшне актив дәвам итәбез. Безнең максат – Татарстан һәм башка җитештерүчеләрнең продукциясен Фарсы култыгы илләренә вәкилләрен чит илгә җибәрмичә яисә халыкара аудиторларны безнең төбәккә чакырмыйча гына экспортлау мөмкинлеген тәэмин итү. Без урыннарда сертификацияләү буенча барлык мәсьәләләрне хәл итәргә омтылабыз. Аккредитация Фарсы култыгы илләре стандартларына гына түгел, ә SMIIC таләпләренә дә (Төркиядә Ислам Хезмәттәшлеге Оешмасы каршындагы стандартлаштыру һәм метрология институты стандартлары) туры килүне раслау процессын җиңеләйтәчәк», – диде Аббас хәзрәт.
Түгәрәк өстәлдә видеоконференцэлемтә буенча SMIIC генераль сәркатибе Ихсан Овут та чыгыш ясады, ул үз оешмасының эшчәнлеге турында сөйләде.
«Без материалистик максатлар белән бирелә торган логотиплар һәм сертификатлар кысаларыннан чыга торган хәләлгә бербөтен якын килүне хуплыйбыз, әмма без консенсуска, фәнни методологияләргә һәм махсуслаштырылган экспертизага нигезләнгән стандартларның кирәклеген әйтәбез. Бу уңайдан Татарстанда җитештерүчеләр арасында ОИС/SHIK Halal стандартларын кертү берничә сәбәп аркасында хәлиткеч әһәмияткә ия. Әлеге бердәм стандартларны кабул итү барлык хәләл продуктларның бертөрлелеген, ышанычлылыгын һәм сыйфатын тәэмин итә, бу кулланучыларның ышанычын эчке дәрәҗәдә дә, халыкара дәрәҗәдә дә саклап калу өчен бик мөһим», - диде ул.
Шулай ук, Оват сүзләренчә, SMIIC ОИС стандартларына туры килү Татарстанда җитештерүчеләргә яңа базарлар ачып һәм экспорт мөмкинлекләрен киңәйтеп, Россиянең хәләл продуктларына дөньякүләм ихтыяҗны уңышлы канәгатьләндерергә мөмкинлек бирәчәк. Мондый алым Татарстанда Хәләл индустриянең икътисади потенциалын үстерүгә генә түгел, ә регионның халыкара стандартларны үтәргә әзерлеген дә күрсәтә, хәләл продукция белән тәэмин итүнең глобаль чылбырында хезмәттәшлеккә һәм ышанычка ярдәм итә.
2024 елның башлангыч нәтиҗәләре буенча Татарстан хәләл продукцияне 13 млн долларга якын экспортлаган. Бу хакта Татарстан Республикасы Авыл хуҗалыгы һәм азык-төлек министры урынбасары Рөстәм Гайнуллов хәбәр итте. Ул шулай ук Малайзия һәм Индонезия кебек илләр, шулай ук Фарсы култыгы, Якын Көнчыгыш, Төньяк Африка һәм Көньяк-Көнчыгыш Азия илләре Татарстанның хәләл продукциясен китерү өчен иң перспектив юнәлешләр булып тора, дип өстәде. Татарстан продукциясен сатып алучы илләрдә хәләл кондитер, сөт һәм ит продукциясе аеруча зур кызыксыну уята, дип өстәде ул.
Чара нәтиҗәләре буенча катнашучылар республикада хәләл индустрияне үстерү мәсьәләләре ведомствоара һәм тармакара якын килүне, шулай ук икътисадның барлык секторларының тотрыклы эшләвенә ярдәм итә торган кирәкле карарлар эшләү өчен барлык кызыксынган якларның көчләрен берләштерүне таләп итүен билгеләп үтте.
Фото: ТР Диния нәзарәте
