Арчада хезмәт алдынгыларын бүләкләделәр
«Арча» спорт комплексында «Арча батырларын данлый» дип исемләнгән алдынгылар слеты узды. Бүләкләү тантанасына төрле өлкәдә фидакарьлек үрнәге күрсәтеп эшләүче алдынгылар җыелды.
Хезмәт алдынгыларын Арча муниципаль районы башлыгы Илшат Нуриев, җиденче чакырылыш Татарстан Республикасы Дәүләт Советы депутаты Марат Бохараев, Татарстан Республикасы авыл хуҗалыгы һәм азык-төлек министрының урынбасары Рафаэль Фаттахов, ТР Мәдәният министры урынбасары Дамир Натфуллин сәламләде.
Чарада махсус хәрби операция зонасыннан кыска вакытлы ялга кайткан ир-егетләр катнашты. Илшат Нуриев үз чыгышында аларга рәхмәт сүзләрен җиткерде.
«Ватан сагына баскан, илебез халкының тынычлыгын саклаучы, үз гомерләрен кызганмаучы батыр ир-егетләребезгә рәхмәт. Аларга бер генә теләк, туган якларына исән-сау әйләнеп кайтсыннар», – диде ул.
Слетта дәүләт бүләгенә лаек булучылар, алдынгы оешма һәм хуҗалык җитәкчеләре, «Иң яхшы комбайнчы-2024» район конкурсында җиңүче кыр батырлары, азык әзерләүче комбайнчылар, механизаторлар, сыер савучылар, терлекчелек өлкәсендә хезмәт куючылар бүләкләнде.
«2024 ел районыбыз өчен уңышлы ел булды. Киләчәктә дә югары күрсәткечләргә, зур хезмәт уңышларына ирешеп эшләргә язсын», – диде Илшат Нуриев.
Бүләкләү тантанасы район сәнгать осталары, «Арча егетләре» халык вокаль ансамбле, ТР Дәүләт җыр һәм бию ансамбле чыгышлары белән үрелеп барды.