Оңтүстік Кореяның бұрынғы қорғаныс министрі өзіне қол салмақ болған
"Ренхап" агенттігінің мәліметінше, қазір бұрынғы министр "қорғаныш камерасында", оның денсаулығына қауіп жоқ.
Ким Ен Хенге қатысты тергеумен қауіпсіздік жөніндегі тергеу тобы айналысып жатыр. Бұған дейін оған мемлекетке сатқындық жасау және бүлік ұйымдастыру баптары бойынша айып тағылған. Ол халық алдында кешірім сұрап, 4 желтоқсанда отставкаға кеткен. Ким адвокаттары арқылы "бар жауапкершілікті өз мойнына алатынын" айтып, қарамағындағылар "жәй әншейін бұйрық орындағанын" айтқан.
11 желтоқсанда полиция президент Юн Сок Ельдің әкімшілігінде, ұлттық полиция агенттігі, Сеул полициясы және ұлттық жиынға қарасты қауіпсіздік қызметінде тінту жүргізді деп хабарлады "Ренхап" агенттігі. Тінтуді әскери жағдайды тергеп жатқан арнайы топ жүргізген.
Юн Сок Ель 3 желтоқсанда "Солтүстік Кореяны жақтайтындармен күресу мақсатында" елде әскери жағдай енгізіп, ізінше парламент жарлықтың күшін жойған. Президенттің әрекеті елде жаппай наразылық туғызып, наразылар оның отставкасын талап етті. Президент пен оның айналасындағылар "бүлік ұйымдастырмақ болды" деген күдікке ілінді. 7 желтоқсанда парламентте депутаттар президентке импичмент жариялау туралы құжатқа дауыс беріп, тиісті дауыс алынбағандықтан құжат қабылданбаған. Оппозиция қалай болғанда да Юн Сок Ель тиісінше жауап беруіне күш саламыз деген. Оған елден кетуге тыйым салынды.