حکومت وايي پر پوځ یې د نیوکو پر سر د یوشمېر بهر مېشتو پاکستانیانو شناختي کارډونه بند کړي دي
د اطلاعاتي او خپرونو چارو وفاقي وزیر عطاالله تارړ د ډېسېمبر پر ۱۰مه په اسلام اباد کې خبريالانو ته وويل، په دې اړه د حکومت تګلاره واضحه ده چې د امنيتي ځواکونو پر ضد خبرې نه شي زغملای.
نوموړي له وضاحت او شمېرو ورکولو پرته وويل چې حکومت د ګڼو بهر مېشته پاکستانيانو پاسپورټونه، شناختي کارډونه او د ټولنیزو شبکو حسابونه (اکاونټونه) په تور لېسټ کې اچولي او پر نورو هم نظر ساتي.
دا په داسې حال کې ده چې د ډېسېمبر پر ۱۰مه په نړۍ کې د بشري حقونو د نړیوالې ورځې په توګه ولمانځل شوه. پر هغه ورځ د پاکستان بشري حقونو کمېشن پر حکومت غږ وکړ چې له خلکو دې د شناخت او سفر اسناد نه اخلي، ځکه چې په وينا یې دا د انسانانو لومړنی حق دی.
په تېرو کلونو کې پښتنو ملتپاله ګوندونو، پښتون ژغورنې غورځنګ (پي ټي اېم) او فعالانو په بیا بیا ویلي چې حکومت د ګڼو پښتنو شناختي کارډونه تړلي دي. د پي ټي اېم په کوربه توب د پښتنو قامي عدالت په نوم جرګې هم په اکتوبر کې وویل چې حکومت د ۲۱۷،۰۰۰ پښتنو شناختي کارډونه بند کړي دي.
د پاکستان حکومت په تېرو کلونو کې ویلي دي چې که څوک ګڼي چې چارواکو یې په غلطۍ کارډ بند کړی نو د وګړو د نوملیکنې، شناختي کارډونو او نورو اسنادو ادارې (نادرا) ته دې شکایت وکړي.