Актанышта «Игелек марафоны»нда 2 миллион сумнан артык акча җыелды

Бүген Актанышта 25нче тапкыр «Игелек марафоны» узды. Марафонда 2280160 сум акча җыелды. Актаныш районы авыл җирлеге башлыклары, оешма-предприятие, төзүче оешма җитәкчеләре, эшмәкәрләр, мәгариф, медицина, мәдәният хезмәткәрләре, «Игелек үзәге» хезмәткәрләре, спортчылар сәхнәгә күтәрелеп «Игелек марафоны»на үз өлешләрен кертте. Бу хакта «Актаныш» сайтында Ләйсән Газизова яза.

Чирек гасыр дәвам иткән «Игелек марафоны» Актаныш районында яшәүчеләрнең никадәр кешелекле, мәрхәмәтле булуы хакында сөйли, ел саен райондашлар, хезмәт коллективларында, хуҗалыкларда эшләүчеләр, эшмәкәрләр кулларыннан килгәнчә инвалидларга хәйрия ярдәме күрсәтә, акчалата булыша. 25 ел дәвамында мөмкинлекләре чикләнгән меңнәрчә кешеләрнең гомерләрен озайту, сәламәтлекләрен кайтару, аякка бастыру, якты дөньяның матурлыгын күрсәтүдә «Игелек марафоны»ның өлешен әйтеп бетерү мөмкин түгел.

Актаныш районы инвалидлар җәмгыяте җитәкчесе Фәйрүзә Разетдинова мөмкинлекләре чикләнгән райондашлар белән алып барылган эшчәнлек турында сөйләде, уңышлар белән таныштырды, 2023 елда «Игелек марафоны»нда җыелган акчага хисап тотты. Шуңа да марафонны киләчәктә тагы да дәвам итү, чикләрен киңәйтү мөһим. Бу хакта бүгенге чарада Актаныш муниципаль районы башлыгы Ленар Зарипов билгеләп үтте.

«Сәламәт кеше эшкә бара да өенә кайта, ә мөмкинлеге чикләнгән кеше өчен һәрбер туган таң, һәрбер үткән көн зур батырлык. Шул авырлыкларны җиңәргә ярдәм иткәнегез, «Игелек марафоны»нда катнашкан һәркемгә зур рәхмәт!» – диде район башлыгы һәм «Игелек марафоны»на старт биреп акчалата ярдәм күрсәтте.

Актаныш районы мөмкинлекләре чикләнгәннәр белән актив эшләүче фидакарь затларга Россия, Татарстан, Актаныш районының мактаулары тапшырылды, республика инвалидлар спартакиадасы җиңүчеләре хөрмәтләнде.