Этләрне мәҗбүри теркәү турында закон проекты Татарстан Дәүләт Советына кертелде
Татарстанда республика территориясендә асрала торган этләрне мәҗбүри теркәү тәртибе кертергә телиләр. ТР Хөкүмәте ТР Дәүләт Советына шул хактагы закон проектын керткән. Документны хәзер карыйлар.
Закон проектында «Татарстан Республикасында хайваннарга карата мөнәсәбәт өлкәсендә аерым мәсьәләләрне җайга салу турында»гы законның дүртенче маддәсенең ике пункты үз көчен югалткан дип танырга тәкъдим ителә.
«Күрсәтелгән нормаларда этләрне хәбәр итеп (ирекле) теркәү тәртибен билгеләүне ТР Министрлар Кабинетына беркетә торган нигезләмәләр, шулай ук этләрне хәбәр итеп (ирекле) теркәүне гамәлгә ашыру буенча ТР Министрлар Кабинеты Баш ветеринария идарәсенең вәкаләте бар. Үзгәрешләр кертелгәннән соң республика территориясендә асрала торган этләрне мәҗбүри теркәү тәртибен кертү ниятләнә», - диелә закон проектының аңлатма язуында.
Билгеләп үтелгәнчә, республика дәрәҗәсендә билгеләнгән ирекле теркәү тәртибе хуҗасыз хайваннар санын киметү һәм югалган этнең хуҗасын эзләү мәсьәләсен хәл итми.
Әйтик, 2027 елда татарстанлылар – 2862, 2022 елда – 532, ә 2023 елда 65 этне ирекле рәвештә теркәгән. Шул ук вакытта, узган елдагы Бөтенроссия йорт хайваннарын исәпкә алу мәгълүматлары буенча Татарстанда 125 мең эт исәпләнә.
Федераль закон нигезендә, Россия төбәкләре дәүләт хакимияте органнары йорт хайваннарын асрауга карата өстәмә таләпләр билгеләргә хокуклы.