Татарстанда волонтерлык эшчәнлегендә катнашучыларга ярдәм чаралары исемлеге расланды. Республика Министрлар Кабинетының бу хактагы карарын Татарстан Премьер-министры Алексей Песошин имзалады.
Республика башкарма хакимияте органнары хәзер ярдәм чаралары турында мәгълүматны «Добро.рф» волонтерлык үсеше өлкәсендә бердәм мәгълүмат системасында урнаштырырга тиеш була.
Татарстан муниципаль берәмлекләренең җирле үзидарә органнарына волонтерларга ярдәм итүнең шундый ук чараларын расларга тәкъдим ителде. Карарның үтәлешен ТР Яшьләр эшләре министрлыгы тикшереп торырга тиеш.
Ярдәм чаралары исәбенә, аерым алганда, «Татарстан Республикасында яшьләр сәясәтен үстерү» ТР Дәүләт программасы кысаларында коммерцияле булмаган оешмаларга һәм физик затларга, муниципаль автоном һәм бюджет учреждениеләренә республика бюджетыннан субсидияләр рәвешендә грантлар бирү керде. Шулай ук гражданлык җәмгыятен үстерүгә Татарстан Республикасы Рәисе грантларына конкурс кысаларында волонтерлык эшчәнлеген оештыручыларга, волонтерлар оешмаларына һәм волонтерлыкның ресурс үзәкләренә грантлар бирү каралган.
Ярдәм чараларына шулай ук төбәкнең волонтерлар бергәлеге тарафыннан чаралар үткәрү, волонтерларның шәхси кенәгәләрен рәсмиләштерү, волонтер оешмалары чаралары өчен мәйданчыклар бирү, волонтерларның җәмәгать эшлеклеләре белән очрашуларын оештыру, волонтерларның (шул исәптән 55 яшьтән өлкәнрәк затларның) төрле профильле чараларда катнашуына ярдәм итү һәм волонтерлар вакыйгалары өчен дизайн-макетлар булдыру керә.
Моннан тыш, исемлеккә мәгълүмати, консультацион, милек һәм методик ярдәм кертелгән. Мәгълүмати ярдәмгә рәсми интернет-ресурсларда волонтерлык белән бәйле вакыйгалар турында мәгълүмат урнаштыруны, мондый чараларны яктыртуга массакүләм мәгълүмат чараларын җәлеп итү һәм «Мәрхәмәтле Татарстан» премиясе җиңүчеләренең эшчәнлеге турында мәгълүмат бирү каралган.
