Иран: Нобел сыйлыгынын лауреаты Мохаммади түрмөдөн убактылуу бошотулду
"Cоттук медэксперттин бүтүмүнөн кийин Тегеран прокуратурасы Наргиз Мохаммади айымга жазасын өтөөнү үч жумага жылдырып, ал түрмөдөн бошотулду. Буга анын 21 күн мурун жасалган операциянын жыйынтыгында залалдуу шишикти жана чириген сөөгүн алдыргандан кийинки абалы себеп болду", - деп жазды адвокат Мустафа Нили X социалдык түйүнүнө.
"Фарда" радиосунун булактары 52 жаштагы Мохаммади бошотулганын ырасташты. Мохаммади ондогон жылдар бою Иранда адам укуктарын коргоо үчүн жан үрөп келген. Соңку 20 жылдан бери ал түрмөдө отурат. 2021-жылдын март айынан бери ал беш жолу соттолуп, учурда Ислам Республикасына каршы "пропаганданы жайылтканы үчүн" 12 жылдык жазасын өтөп жатат.
"Мен ушунча азап тартканыма карабастан, биздин аракеттер дароо болбосо да өз жемишин берет деген үмүтүмдү үзө элекмин жана буга ишенем", - дейт Наргиз Мохаммади.
Ноябрь айында күйөөсү Таги Рахмани аялы эки ай кыйналгандан кийин Тегеран ооруканасына которулганын билдирген.
"Анын оң бутуна операция жасалды. Ал түрмөдө отуруп-тура албай, кыймылдай албай калган. Түрмөдөгүлөрдүн айрымдары анын бошотулушун талап кылып ачкачылык жарыялап жиберишти", - деген Рахмани "Фарда" радиосуна.
Наргиз 2010-жылдан бери түрмөдөн чыкпаганына карабастан, жабык жайлардагы шарттар, ал жактагы аялдар дуушар болгон кыйынчылыктар тууралуу коомго маалымат жеткиргенге аракет кылып келет.
Ал Нобелдин Тынчтык сыйлыгынын лауреаты болуп 2023-жылы табылган. Сыйлыкты Ослодо өспүрүм балдары алган.