Оңтүстік Корея оппозициясы президентке импичмент жариялау туралы заң жобасын ұсынбақ
Құжат 5 желтоқсанда парламентке енгізіледі және екі күн бойы оған дауыс беріледі. Заң жобасы қабылдануы үшін депуттардың үштен екісі (200 депутат) қолдап дауыс беруі керек. Парламентте оппозицияның 192 мандаты бар.
Бұған дейін оппозиция партиялары Юн Сок Елді мемлекетке опасыздық жасады деп айыптамақ болып отырғаны хабарланған. Олардың сөзінше, әскери жағдай енгізіліп, әскерилердің парламентті басып алуға тырысуы бүлікпен пара-пар.
Юн Сок Ел "Солтүстік Кореяны жақтайтындармен күресу үшін" 3 желтоқсанда жергілікті уақыт бойынша сағат 22:35-те әскери жағдай енгізген. Алты сағат күшінде болған режим саяси партиялардың жұмысына, наразылық, ереуілдерге тыйым салып, цензура енгізген.
Парламент ғимараты алдына наразылар жиналды. Оппозиция мәліметінше, олардың саны 5 мыңға жуықтаған. Әскерилер ғимаратқа басып кіруге талпынып жатқан шақта депутаттар әскери жағдай енгізу туралы шешімге дауыс беріп, оның күшін жойған. Осыдан кейін президент парламенттің шешімін қолдауға мәжбүр болған.