Төрага Шакиев шайлоодогу гендердик квотаны сынга алды
“Ишкерлерди укуктарын коргоо жөнүндө” мыйзам долбоору үчүнчү окууда каралып жатканда депутат Исхак Масалиев бул документ менен “айымдар ишкердиги” түшүнүгү кирип жатканын сынга алып, ишкердик тегиз каралышы керек деген пикирин билдирди.
Төрага Шакиев Масалиевдин пикирин кубаттап, шайлоодогу гендердик квота маселеси да каралышы керектигин айтты.
“Туура айтасыз, ишкердикте баары тең болушу керек. Гендер-гендер дейбиз, артыкчылыктарды беребиз. Шайлоого келгенде гендердик маселе иштебей калат. Шайлоодогу ушул квота маселесин карап чыгуу керек. Бардык эле жерде тең, кээде ашып кетишет да, шайлоого келгенде эле түшүп калышат “биз алсызбыз, квота беришиңер керек” деп”, - деди Шакиев.
Депутат Камила Талиева мыйзам долбоору ишкердик менен алектенген аз сандагы айымдарды колдоого аларын белгилеп, төраганын пикирине макул эместигин айтты.
“Өткөндө өлкө боюнча чогулган жыйында ишкер аялдарга сиздин атыңыздан сыйлыктарды берип, “мыйзамды төрага өзү колдоп жатат” деп жылуу пикирлерди айтып келдим эле. Бир аз калпычы болуп калдым. Статистикада үй жумуштарын 97% аялдар аткарат экен. Ишкердикке келгенде алар мамлекеттен, банктан насыя ала албайт, эл аралык уюмдар эле көтөрүп атат. Мыйзамдагы экинчи беренеге “ишкер аял” деген терминди гана киргиздик. Перспективада аларга каржы жагынан кичине жардам болсун деген ниетте, силерден бийлик талашкан эч ким жок, айланайын эркектер. Аман болгула, андай көз караштан кетели”.
Кыргызстанда аялдардын бийликтеги орду, мамлекеттик жетекчилик кызматтардагы жетишсиздиги тууралуу маселе эгемендик алгандан бери улам көтөрүлүп келип, 2009-жылы Кыргызстан гендер теңдиги жөнүндө мыйзам кабыл алган. Анда бир жыныстагы кызматкерлердин саны жалпы жамааттын 30 пайызынан кем болбошу керек деп жазылган. Бирок коомчулукта бул талап көбүнчө эмгек акысы аз төлөнгөн, социалдык кызматтарда эле сакталып келе жатканына дооматтар бар.
Жогорку Кеңеште 20 аял депутат бар. Алардын 19у партиялык тизме менен, бирөө бир мандаттуу округдан шайланып келген. (TAb)