Уфада Мостай Кәримнең яңа китаплары тәкъдим ителәчәк
12 декабрьдә Уфаның «Артерия» үзәгендә Мостай Кәримнең яңа китаплары тәкъдим ителәчәк. Бу хакта «Башинформ» агентлыгы яза.
Мостай Кәрим исемендәге фонд директоры, башкорт әдәбияты классигының кызы Әлфия Кәримова «Инеш» нәшриятында дөнья күргән «Озын-озак балачак» һәм «Әлфия хикәяләре» китапларын тәкъдим итәчәк. Шунысы игътибарга лаек, яңа басмалар Мостай Кәримнең тууына 105 ел тулу уңаеннан нәшер ителгән.
«Озын-озак балачак» повестеның яңа басмасы 2024 елда дөнья күргән һәм ул әдәбият сөючеләрдә зур кызыксыну уята.
«Әлфия хикәяләре» китабы 2024 елда башкорт һәм рус телендә басылып чыккан. Мостай Кәрим әлеге хикәяләрне кызына багышлаган.
«Хыялый, үзсүзле, әмма киң күңелле кыз турындагы «Әлфия хикәяләре» китабының битләрен ачкач, үземнең бәхетле балачагыма әйләнеп кайта алуыма бик шатмын. Хикәя һәм әкиятләрдә уйдырмалар реаль вакыйгалар белән үрелеп бара. Гөлнур минем балачак дустым иде, саескан исә әти-әнием вафат булгач та әле берничә ел дачабызга очып килде. Язын без аны шатланып каршы алдык, ул дачада үзен хуҗабикә кебек хис итте, ә без аның вак-төяк шуклыкларын гафу иттек. Әлеге китап хәзерге балаларның да күңеленә хуш килер дип өметләнәм, чөнки ул яратырга һәм изгелеккә өйрәтә», - дип сөйләде Әлфия Кәримова.