Чаллы мэры хәрбиләрнең 19 гаиләсенә дәүләт бүләкләре тапшырды
Чаллы мэры Наил Мәһдиев Ватанын яклап һәлак булган хәрбиләрнең 19 гаиләсенә дәүләт бүләкләре тапшырды. Алар орден-медальләргә хәрби һәм хезмәт бурычын үтәгән вакытта күрсәткән батырлыгы, кыюлыгы һәм фидакярлеге өчен лаек булды.
Россия Президенты указы белән сержант Юрий Рамздорф, ефрейторлар: Максим Зилаков, Владимир Приемко, кече сержантлар: Павел Айглов, Денис Горскин, ефрейтор Илдар Шәңгәрәев, рядовойлар: Эдуард Анисимов, Александр Антипов, Дамир Гыйльметдинов, Владимир Жуковец, Рөстәм Камалиев, Андрей Леванов, Григорий Маркин, Андрей Прохоров, Рафис Шәрипов, гвардия рядовойлары: Александр Лаврентьев, Владислав Федотов үлгәннән соң Батырлык ордены белән бүләкләнде.
Рядовой Иван Западнов үлгәннән соң Батырлык ордены һәм «Кыюлык өчен» медале, рядовой Дамир Шиһапов «Батырлык өчен» медале белән билгеләп үтелде.
Наил Мәһдиев аларның якыннарына кайгы уртаклашу сүзләрен белдерде.
«Сез шуны белергә тиеш – Чаллы халкы сезнең белән бергә кайгыра, без кулларына корал тотып илебез мәнфәгатьләрен яклаган улларыгыз һәм ирләрегезнең исемнәрен онытмаячакбыз. Алар тормыш алга таба дәвам итсен, балаларыбыз үссен, шәһәр үсеш кичерсен өчен барысын да эшләде. Алар Бөек Ватан сугышы елларында әтиләре һәм бабалары кебек үк үз Ватанын яклады», - дип искәртте ул.
Ул туган илен яклап башын салган геройларның исемнәре алар белем алган уку йортларында һәм мәктәпләрдә мәңгеләштерелүен әйтте.
«Сез улларыгыз һәм ирләрегез белән горурлана аласыз һәм без дә алар белән горурланабыз. Без аларны онытмаячакбыз», - диде мэр.
Чаллының Мәгълүмати сәясәт һәм җәмәгатьчелек белән элемтәләр идарәсе фотолары.