Билим берүү мекемелеринде телефон колдонуу тартиби иштелип чыкты
Документке ылайык, окуучудан баштап, кызматкер же башка жарандар билим берүү мекемесине кирген учурда мобилдик телефонунун добушун өчүрүшү керек. Ал эми класс, кеңсе, аудиторияга кирген окуучу телефонун толук өчүрүп, атайын кутучага салууга милдеттүү.
Атайын сабакка керек болгон же тыныгуу, өзгөчө кырдаалдар сыяктуу учурларда колдонууга уруксат берилет. Мобилдик телефонду мектептин электр тармагына кошууга, ар кандай видео-сүрөттөрдү көрсөтүүгө, тартууга тыюу салынат. Мындай талаптарды бузгандарга оозеки эскертүү, күндөлүккө жазуу жана ата-энесин чакыртуу сыяктуу жазалар каралган. Документти толук бул жерден окусаңыз болот.
Министрлик мындай чара коопсуз окуу процессин камсыз кылуу, билим алуучулардын ден соолугуна кам көрүү, мобилдик аппараттардын зыянын алдын алууга багытталганын белгилейт.
Мектептерде мобилдик телефон колдонууга чектөө киргизүү зарылдыгы буга чейин Жогорку Кеңештин бир катар депутаттары тарабынан көтөрүлгөн. Чөнтөк телефондун зыяны көп болуп жатканын президент Садыр Жапаров да билдирип, аны чектөөнүн жолдорун иликтөөнү тапшырган. Мектептерде окуучулардын чөнтөк телефон колдонуусуна тыюу салган тажрыйбага көңүл буруп, ата-энелери менен бирге иш алып барууну тапшырган.
Кыргызстанда 2350дөй мектеп бар, аларда болжол менен 1,5 миллионго жакын окуучу билим алат. Жалпысынан 74 миңге жакын мугалим иштейт. Былтыр 1-сентябрда мектеп босогосун 150 миңдей бала аттаган. (TSh)