Декабрьдә Идел буе федераль округы территориясендә каты кар явуы көтелә, һава температурасы нормадан югарырак булачак. Бу хакта Россия Гидрометүзәгенең фәнни җитәкчесе Роман Вильфанд сөйләде, дип хәбәр итә РБК.
Метеоролог сүзләренчә, «Идел буе федераль округыннан башлап, [Россиянең Азия өлешендә] кристаллик явым-төшем рәвешендә каты кар явачак».
Кышның беренче аенда Төньяк-Көнбатыш федераль округында, Себернең көнбатышында, Красноярск краеның көнбатышында һәм көньягында, Иркутск өлкәсендә, Хакасиядә, Байкал арты краенда, Бурятиядә, Магадан өлкәсендә һәм Чукоткада явым-төшем нормадан артык булачак, дип аңлатты Вильфанд.
Шул ук вакытта декабрьдә Россия территориясенең күпчелек өлешендә һава температурасы нормадан югарырак булыр дип фаразлана. «<...> температура классы нормадан югарырак, ул, әлбәттә, өстенлек итә. <...> декабрь ае, нигездә, илнең бөтен территориясендә җылы», - дип билгеләде белгеч.
Синоптик белдергәнчә, илдә температура уртача айлык күрсәткечтән түбән булган урыннар булмаячак. Ул Үзәк федераль округның көнчыгышында, Идел буенда, Көнбатыш һәм Урта Себердә, Красноярск краенда һәм Ерак Көнчыгыш федераль округының төньяк яртысында нормадан югарырак көтелә, дип санап китте ул.
Вильфанд аномаль җылы һава торышының сәбәпләре арасында җылы һава массаларының Атлантикадан килүен һәм Себер (Монгол) антициклоны формалашуын атады.
