Сириските бунтовници, противници на претседателот Башар ал-Асад, во петокот објавија дека стигнале до центарот на Алепо, најнаселен сириски град на северот од земјата, по ненадејниот пробив низ територијата под контрола на владата и речиси една деценија откако беа протерани од градот.
Бунтовничките групи, предводени од исламистичката Хајат Тахрир ал-Шам, минатата недела започнаа напади врз десетици места во северната провинција Алепо, контролирани од владата на Асад поддржана од Иран и Русија.
Бунтовниците брзо напредуваа низ територијата на сириската влада, а доцна во петокот објавија дека се наоѓаат во неколку населби на Алепо.
Сириската опсерваторија за човекови права објави дека бунтовниците и нивните сојузници во петокот го освоиле и стратешкиот град Саракиб во северозападна Сирија.
Саракиб се наоѓа во провинцијата Идлиб, а неговото заземање е важно за бунтовниците и нивните сојузници бидејќи ќе им помогне „да го спречат напредувањето на режимот кон Алепо“, пишува Франс прес.
Башар ал Асад ја врати контролата над Алепо на крајот на 2016 година, со помош на Русија, Иран и регионалните шиитски паравојски.
Тогаш бунтовниците се согласија да се повлечат по долга опсада.
Мустафа Абдул Џабер, командант на бунтовниците од бригадата Џаиш ал-Иза, рече дека нивните сили напредувале брзо поради недоволната поддршка од проиранските елементи во областа.
Сојузниците на Иран во регионот претрпеа серија удари од Израел, откако офанзивата во Појасот Газа се претвори во поширока војна на Блискиот Исток, пишува Ројтерс.
Извори од опозицијата изјавија за Ројтерс дека Турција дала зелено светло за офанзивата на бунтовниците, но портпаролот на турското Министерство за надворешни работи рече дека Анкара сака да избегне поголема нестабилност во регионот и предупреди дека неодамнешните напади ги поткопуваат договорите за деескалација.
Минатонеделните напади се најголеми од март 2020 година, по што Русија и Турција се договорија за деескалација.
Сириската државна телевизија ги отфрли тврдењата дека бунтовниците стигнале до градот и објави дека Русија и дава воздушна поддршка на сириската армија.
Сириската армија извести дека продолжува да се спротивставува на нападот и дека им нанела тешки удари на бунтовниците во околината на Алепо и Идлиб.
Руски и сириски авиони ја бомбардираа областа долж границата со Турција во четвртокот, обидувајќи се да го запрат напредувањето на бунтовниците.
Портпаролот на Кремљ, Дмитриј Песков, изјави дека Москва го смета нападот за кршење на суверенитетот на Сирија и нагласи дека Русија „сака сириските власти да ја вратат контролата и уставниот поредок“ во областа што е можно поскоро.
Запрашан за непотврдените извештаи од апликацијата Телеграм дека Асад отпатува во Москва на разговори со рускиот претседател Владимир Путин, Песков рече дека „нема што да каже“ на оваа тема.
На Сирија и е ветена дополнителна воена помош од Русија во борбата против бунтовниците кои се противат на претседателот Асад во близина на Алепо, изјавија два воени извори за Ројтерс.
Дамаск очекува оружјето да почне да пристигнува во руската база Хмејмим во близина на крајбрежниот град Латакија во следните 72 часа, додаваат изворите.
