Адвокат Матцаковду колдоп сотко ондогон адвокат чогулду
"Баары жакшы болот, күрөшөбүз", - деди Матцаков залда турган журналисттерге.
Сот имаратына журналисттерден тышкары Матцаковдун кесиптештери, 50гө жакын адвокат келгенин "Азаттыктын" жеринде жүргөн журналисти кабарлады. Алардын 30га жакыны Матцаковдун сотто кызыкчылыгын коргоо үчүн ордер беришти. Адвокаттар козголгон иш менен таанышууга мүмкүнчүлүк берүүнү талап кылышты.
Матцаковдун адвокаттары ишти караган судьяга ишенбөөчүлүк келтирди. Алар мунун алдында иште жабырлануучунун арызы жана шектүүнү суракка алуу протоколу жок экенин айтып, ошол документтерди көрсөтүү өтүнүчүн келтиришкен. Судья бул өтүнүчтү канааттандырган эмес.
Улуттук коопсуздук боюнча мамлекеттик комитет (УКМК) камакта жаткан ишкер Имамидин Ташовдун жана үч жылга кесилген Аскат Жетигендин адвокаты Матцаковду жума күнү кармаган. УКМК бул тууралуу расмий комментарий бере элек.
Матцаков өзүнүн кармалышын абактагы ишкер Имамидин Ташовдун ишине байланыштырып, "алдамчылык" беренеси менен иш козголгонун "Азаттыктын" кабарчысына билдирген.
Матцаков Бишкектин Ленин райондук соту 10-октябрда алты жылга абакка кескен Temirov Live жана “Айт, айт десе” долбоорунун жетекчиси Махабат Тажибек кызынын, беш жыл эркиндигинен ажыратылган “Айт, айт десе” долбоорунун кызматкери Азамат Ишенбековдун жактоочусу. Үч жылдык пробациялык жаза чегерилген журналисттер Актилек Капаров менен Айке Бейшекееванын да укугун сотто коргойт. (AiB)