Роспатентта «Шүрәле», «Су анасы» һәм «Камыр батыр»ны товар билгеләре сыйфатында теркәгән Казан фирмасы тагын ике танылган татар әкияте персонажы исемнәрен – Алтынчәч һәм Убырлы карчыкны үзләштерергә ниятли. «Республика Татарстан» газетасы республиканың үз мәдәни мирасын ничек якларга һәм коммерсантларның планнарына ни рәвешле комачаулык итәргә җыенуы хакында сөйләде.
Әйтик, Дәүләт Думасы депутаты Айрат Фәррахов Роспатентка һәм Икътисади үсеш министрлыгына әлеге вазгыять хакында хәбәр иткән инде. Ике ведомствода да аңа аеруча зур кыйммәткә ия мәдәни мирас объектлары, шул исәптән матди булмаганнары да товар билгесе сыйфатында теркәлә алмый дип белдергәннәр. Бу Россия Гражданнар кодексының 1483 маддәсе 4 пунктына каршы килә.
«Миңа аеруча зур кыйммәткә ия мәдәни мирас объектларын товар билгесе сыйфатында теркәргә ярамавы турындагы законны мисал итеп китерделәр. Әмма проблеманың асылы шунда ки, мондый объектларның исемлеге әлегә билгеләнмәгән», - дип искәртте ул.
Аның фикеренчә, бу юнәлештәге эшне мөмкин кадәр тизләтергә кирәк. Бу инде бирелгән патентлар белән килешмәскә һәм киләчәктә мондый очракларны булдырмаска мөмкинлек бирәчәк.
Татарстан Мәдәният министрлыгы Роспатентка татар әкиятләре персонажлары исемнәренә бирелгән патентларны кире кайтару турында мөрәҗәгать юллады.
«Җавап әле килмәде, әмма бу юл милли байлык реестрын булдыруга караганда тизрәк дип уйлыйбыз, реестр да кирәк, әлбәттә. Шулай ук безнең карамактагы барлык учреждениеләргә әлеге фирма һәм шундый ук компанияләр белән хәтта бер сумга да бернинди килешү төземәскә куштык», - дип белдерде министрлыкның матбугат хезмәте җитәкчесе Айрат Фәйзрахманов.
Искәртеп узабыз, «Милли уенчыклар» ҖЧҖ «Әкият» Дәүләт курчак текарыннан «Шүрәле» һәм «Су анасы» әдәби геройлары атамаларын кулланган өчен ярты миллион сум акча сораган иде. Элегрәк «Татар-информ» агентлыгы бу хәлнең ничек мөмкин булуы һәм театрның әлеге вазгыятьтә нишләячәге хакында хәбәр итте.
