Казан университетының татар теле һәм әдәбияты бүлегенең 80 еллыгы уңаеннан КФУның Филология һәм мәдәниятара багланышлар институтында бүлекне һәм факультетны тәмамлаган актерлар һәм артистлар белән фатирник форматында очрашу булды.
Фатирникта Татарстан Дәүләт Советы депутаты, Татарстанның халык, Россиянең атказанган артисты Рамил Төхвәтуллин, драматург, Муса Җәлил исемендәге дәүләт бүләге иясе Артем Пискунов, Татарстанның атказанган артисты Резедә Сәлахова, Татарстанның атказанган артистлары Фәнис һәм Алия Кәлимуллиннар, Татарстанның атказанган артистлары Рафаэль һәм Динә Латыйповлар, «Yummy Music» инди-лейблының директоры, продюсер Ильяс Гафаров, җырчылар Айгөл һәм Эльмир Җиһангировлар, Ләйсән Ветрова катнашты.
«Безне менә дигән укытучылар, остазлар укытты. Матур итеп белем бирделәр. Туган тел ул – әти-әни теле. Безнең телебезне дә тәрбияләп, үстереп, яшәтеп, нинди генә каршылыклар булса да, телебезнең матурлыгын югалтмыйча, аның җылылыгын саклап, безгә белем биргән мөгаллимнәребез, остазларыбыз алдында баш иябез. Кайда белем алдың, дисәләр: «Мин татар теле бүлегендә белем алдым», - дип җавап бирәм. Рәхмәт сезгә! Татар телен яратуым һәм татарча сөйләшә белүем белән бәхетлемен», - диде Динә Латыйпова.
«Бу ел институтыбыз өчен бик тә үзенчәлекле. Казан университетының 220 еллыгын да зурлап билгеләп үттек. Шулай ук, үз вакытында факультет булган татар теле, әдәбияты бүлегенең 80 еллыгын билгеләп үтәбез. Бик күп чаралар узды, конференция, семинарлар, төрле конкурслар, олимпиадалар булды. Ә инде соңгы арада үткәрелгән чаралар – истәлекле, аеруча кыйммәтле. Чөнки әлеге чараларда һәр көнне төрле юнәлешләрдә дөнья күләмендә танылган галимнәр, укытучылар белән очрашулар булды», - диде Филология һәм мәдәниятара багланышлар институты директоры Рәдиф Җамалетдинов.
Фото: © «Татар-информ», Зилә Мөбәрәкшина
Ул фатирникта катнашкан һәр шәхесне сәхнә йолдызлары дип атады һәм аларның мәдәният өлкәсендә танылган булуларын билгеләп үтте. «30 ноябрьдә УНИКСта «Канат ярганда» дигән әдәби-музыкаль кичә үткәреләчәк, 7 декабрьдә КФУның актлар залында Ирнис Рәхимуллин җитәкчелегендә Татар халык хорының татар бүлегенә багышланган концерты була. Чаралар шуның белән төгәлләнә. Сезнең монда булуыгыз безне яңа фикерләргә этәрде. Хәзер яңа планнар белән яши башладык, риза булсагыз, киләсе елларда да мондый очрашуларны дәвам итәр идек», - диде институт директоры.
«Еш кына безнең институтка укырга керүчеләр мондый сорау бирә: «Кем булып чыгарбыз, кайда эшләрбез икән?» – диләр. Болай дип җавап бирәбез: «Киләчәктә филолог, укытучы була аласыз, фән һәм мәдәният өлкәсенә кереп китә аласыз. Шул ук вакытта Рамил Төхвәтуллин, Равил Әхмәтшин, Данис Шакиров кебек эш урыннарында эшли аласыз», - дибез. Һәркемнең язмышы үз кулында. Яшьләр юлны сайлаганда аларга сезнең киңәшләрегез бик кирәк», - диде Рәдиф Җамалетдинов.
«Мөхәммәт ага Мәһдиев миңа катгый рәвештә таләпчән иде. Вафатына бер ай кала без аның белән очраклы урамда күрештек. «Рамил, син мине гафу ит. Мин сиңа гел «дүртле» куйдым, чөнки син авыл балаларына караганда күбрәк белергә тиешсең, дигән таләп белән сынадым», - диде. Йомшак карау булгандыр, чөнки остазларыбызның безгә карата бик мәгънәви максатлары бар иде. Алар безгә: «Бу киләчәктә безнең зыялылар дәрәҗәсенә үсә торган балалар булсын иде», - дигән теләк белән карадылар алар. Усаллык белән түгел, ә ата-ана, абый-апа буларак карадылар», - диде Рамил Төхвәтуллин.
«Барлык укытучыларыбызга, остазларыбызга уңышлар телибез. Без үзебезнең юнәлеш буенча – укытучы булмасак та, журналистикадан китмәсәк тә, мөгаллимнәр салган татар рухы әле дә күңелдә саклана. Ул гаиләгә дә күчә. Нинди генә мәҗлес үткәрмик, концертлар куймыйк, кайда укыдыгыз дип, сорамыйча калганнары юк. Димәк, ул телебездә дә, үз-үзебезне тотышыбызда да чагыла. Һәр остазыбызга рәхмәт», - диде Эльмир һәм Айгөл Җиһангировлар.
Фатирникта артистлар татар бүлеге турында истәлекләре белән уртаклашты, яраткан җырларын башкарды, спектакльләрдән өзекләр уйнадылар. Алар татар теле һәм әдәбияты бүлегенә укырга керүләре, иң яраткан профессор, иң кадерле истәлекләр, лифт тарихы, ашханә, имтихан тапшыру һ.б. тарихлар турында сөйләде. «Yummy Music» инди-лейблының директоры, продюссер Ильяс Гафаров яңа дөнья күргән клибын – Дәрдемәнднең «Кораб» шигыренә язылган җырны тәкъдим итте.
«Тормышыбыз – һәркемнең үз кулында. Без бирегә килгәнбез һәм татар бүлеген тәмамлаган икән, барыбыз да – татфаклылар. Бу – зур шатлык һәм зур бәхет. Остазларым, курсташларым, чын күңелдән бик зур рәхмәт сезгә! Киләчәктә әйбәт студентлар килсен һәм һәрберебезгә яшисе килә дип, яшәргә язсын», - диде Ләйсән Ветрова.
Фото: © «Татар-информ», Зилә Мөбәрәкшина
