Республиканың барлык районнарында Татарстан Дәүләт флагы көне уңаеннан чаралар узачак
Иртәгә, 29 ноябрьдә, республиканың барлык районнарында Татарстан Дәүләт флагы көне уңаеннан чаралар узачак.
Аерым алганда, Татарстан башкаласында «Казан» Гаилә үзәге янында «Бердәм Россия Яшь гвардиясе» вәкилләре студентлар, иҗтимагый оешма активистлары һәм шәһәрнең гади гражданнары белән берлектә 50х25 метр үлчәмле Татарстан Республикасы флагын җәячәк.
Моннан тыш, көн дәвамында Татарстанның барлык муниципаль районнары һәм шәһәр округларында да ТР дәүләт флагы төсләрендәге тасмалар таратырга ниятлиләр.
Шулай ук барлык муниципалитетларда Татарстан флагын тантаналы рәвештә күтәрү, аны зур әһәмияткә ия яки тарихи урында җәю акцияләре, яшьләр активистларының байраклар кебек тезелүе рәвешендәге флешмоблар, әләмнәр белән автойөреш, белем бирү оешмалары һәм мәдәният учреждениеләрендә ТР флагының барлыкка килү тарихына, аның төсләренең нәрсә аңлатуына һәм алар белән эш итү кагыйдәләренә багышланган сыйныф сәгатьләре, лекция һәм викториналар, бәйгеләр, иҗади һ.б. чаралар планлаштырылган.
17.00 сәгатьтән 23.00 сәгатькә кадәр Казан һәм Түбән Кама телебашняларында тематик утлар кабыначак. Казанның «Ак Барс Арена» стадионы медиафасадында Татарстан флагына багышланган ролик трансляцияләнәчәк. Реклама таблосында ТР Дәүләт флагы көне уңаеннан котлау рәсеме барлыкка киләчәк.
Татарстан Югары Советы 1991 елның 29 ноябрендә яшел-ак-кызыл төсләрдәге флагны республиканың яңа дәүләт символы сыйфатында раслады.