Орусиянын миграция борборунун өкүлчүлүгү Ош шаарында ачылат
Анын сөзүнө караганда, министрлик Орусиянын көп функционалдуу миграциялык борборунун ("Сахарово") өкүлчүлүгүн Кыргызстанда ачуу тууралуу келишим түзүлгөн. Бул өкүлчүлүк Ош шаарында ачылат.
"Орусия миграция борборунун бизде өкүлчүлүгү болушуна биз дагы буга кызыкдарбыз. Анткени бул биздин жарандарга өлкөдөн чыгар алдында зарыл процедуралардан өтүүгө жана мыйзамдуу түрдө Орусиянын аймагында болууга жардам берет. Орусияга негизги миграциялык агым республиканын түштүк аймактарынан келгендиктен, Ош шаарында өкүлчүлүк ачуу чечими кабыл алынды. Учурда Орусия тарап жана Ош мэриясы менен сүйлөшүү процесси жүрүүдө", - деди Дарманкул уулу.
Министрдин орун басары Орусияга барган кыргызстандык жарандар ал өлкөнүн мыйзамдарын сакташы керек деген талаптар менен бирге эле, алардын ал жакка барышында көйгөй болбошу керектигин эскертти.
Орусиянын миграция борборунун филиалын Кыргызстанда ачуу сунушу Эмгек, социалдык камсыздоо жана миграция министри Жылдыз Полотова 25-октябрда Москва шаарында "Көп функционалдуу миграциялык борбор" мамлекеттик мекемесинин жетекчилиги менен жолугушкан учурда берилген.
Соңку учурларда кыргызстандыктардын Орусиянын аймагына кирүүсүнө тоскоолдуктар болуп, текшерүүлөр күч алууда. Москвага учуп барган кыргызстандыктардын ичинен ондогон жарандар түрдүү себептер менен Орусияга киргизилбей, артка кайтарылган.
Ушундан улам Тышкы иштер министрлиги Орусиянын элчилиги менен сүйлөшүүлөрдү жүргүзүп, мындай кырдаалга тынчсыздануусун билдирген учурлар бар.
ТИМ өткөн айдын башында Орусиядагы кошумча коопсуздук чараларынын киргизилишинен жана мамлекеттик чек арадан чет өлкөлүк жарандарды өткөрүүдө көзөмөлдүн күчөтүлүшүнөн улам кыргыз жарандарын зарыл иши болбосо Орусияга убактылуу барбай турууга чакырган.
Быйыл Москвада "Крокус Сити Холлдо" кеминде 145 кишинин өмүрүн алган куралдуу чабуулдан кийин Орусияда мигранттарга каршы маанай күчөгөн. Кылмышка шектүүлөрдүн көбү тажик тектүү жарандар экени аныкталган.
Расмий маалыматка караганда, учурда Орусияда 411 миңден ашык кыргызстандык мигрант бар. (ZKo)