Россия Федерациясе гражданы паспортына салым түләүченең идентификация номеры (ИНН) һәм гражданның кан төркеме турындагы белешмәләрне тиешле оешмалар теркәргә хокуклы, әмма алар мәҗбүри тамга түгел, диелә Эчке эшләр министрлыгы материалларында. Әлеге материаллар белән РИА Новости танышкан.
Элегрәк хәбәр ителгәнчә, Россия гражданы паспортын биргән яки алыштырган чакта мәҗбүри тамга булып яшәү урыны буенча теркәлү яки исәптән төшерү, шулай ук хәрби бурыч турындагы белешмәләр тора. Гражданның теләге буенча паспортка өйләнгән/кияүдә булу һәм 14 яшькә кадәрге балалары, элек бирелгән паспортлары, шулай ук чит илләрдә РФ гражданының шәхесен таныклаучы төп документлар турында белешмәләр теркәлергә мөмкин.
«Паспортка башка органнар һәм оешмалар куя торган мәҗбүри булмаган тамгалар теркәлергә мөмкин», - диелә документта.
Ведомство аңлатканча, мондый тамгаларга салым түләүченең идентификация номеры һәм РФ гражданының кан төркеме турындагы мәгълүматлар керә.
