Грузиянын башкаруучу партиясы президенттикке мурдагы футболчуну көрсөтөрүн жарыялады
1995-жылы Кавелашвили Владикавказ шаарындагы "Спартак-Алания" командасынын курамында Орусиянын чемпиону наамын алган. 2016-жылдан бери парламент депутаты. Алгач ал башкаруучу партиянын атынан депутат болгон, кийин өзүнчө бөлүнүп чыккан "Элдик күч" саясий тобун жетектей баштаган. Бул топ негиздеген партия өзүнүн Батышка каршы жана "салттуу баалуулуктарды" колдогон саясаты менен белгилүү.
Кавелашвили Батыштын, оппозициянын сынына кабылган "чет элдик агент", ЛГБТны чектөө мыйзамдарын колдоп гана эмес, активдүү сүрөп, үгүттөгөн.
53 жаштагы Кавелашвилинин билими тууралуу так маалымат ачык булактарда жок. Футболдук карьерасын ал 1980-жылдары баштаган.
Грузин оппозициясы аны орусиячыл көз караштагы саясатчы деп атайт.
Президенттик шайлоо бул өлкөдө 14-декабрда өтөт. Мамлекет башчыны шайлоо бул жолу жаңы система боюнча уюштурулат – жалпы элдик добуш берүү болбойт, шайлоочулар коллегиясы добуш берет. Коллегия курамында 300 мүчөсү бар, алардын 150сү парламенттин, 21и Ажария аймагынын жана 20сы жикчил Абхазиянын жергиликтүү кеңештеринин депутаттары, 109у муниципалдык кеңештердин делегаттары болот.
Биринчи турда жеңишке жетиш үчүн талапкер 200дөн кем эмес добушка ээ болушу шарт. Эгер экинчи тур зарыл болуп калса, аны ошол эле күнү өткөрүшөт. Добуш берүү парламенттин имаратында уюштурулат.
"Грузин кыялы" партиясынын ардактуу төрагасы, орусиячыл миллиардер олигарх Бидзина Иванишвили шайлоого катышпай турганы 25-ноябрда жарыяланган.
Жаңы башчы беш жылдык мөөнөткө шайланат, анын инаугурациясы 29-декабрда өтөт.
Азыркы президент Саломе Зурабишвили бийликке 2018-жылы "Грузин кыялынын" колдоосу менен келген, бирок кийин өлкөдөгү окуяларга карата көз карашта ажырым пайда болгон. Азыр ал октябрда өткөн парламенттик шайлоо таза болбогонун айткан оппозицияны колдоодо.
26-октябрда өткөн парламенттик шайлоодо "Грузин кыялы" партиясы добуштардын 53,92% алган, ал эми оппозицияга 38% тийгени жарыяланган.
Европа Биримдигине жана НАТОго мүчөлүккө талапкер Грузияда аталган партия бир нече орусиячыл демилге көтөрүп, ишке ашырды. Бул үчүн ал Батыштын сынына кабылууда.
Парламенттик шайлоо таза өтпөгөнүн айтып, бийликти орусиячыл саясаты үчүн сындап чыккан миңдеген демонстрантты полиция күч менен таркаткан. (RK)