1 декабрьдә 14:00 сәгатьтә Мәскәү Татар мәдәни үзәгендә РФ һәм ТР атказанган артисты Илдар Шиһаповның юбилей концерты була. Бу хакта Мәскәү татарлары автономиясе хәбәр итә.
Илдар Шиһапов – Татар мәдәни үзәге сәнгать җитәкчесе. Аның һөнәри эшчәнлеге төрле елларда Мәскәү шәһәре «Москонцерт» мәдәният учреждениесе, Казан филармониясе белән бәйле. РФ һәм ТР атказанган артисты шулай ук заманында Илһам Шакиров, Әлфия Авзалова һәм башка күренекле музыкантлар белән бергә эшләгән.
Шиһапов талантлы башкаручылар — халыкара конкурсларда катнашучылар һәм җиңүчеләр плеядасын тәрбияләде. 30 елга якын Мәскәү Сабантуе бәйрәмененең алыштыргысыз режиссеры һәм оештыручысы булып тора.
Моннан тыш, ул «Тальян» татар җыры театрын оештырды һәм аны 25 елдан артык җитәкли, диелә хәбәрдә.
