К.Тинчурин исемендәге Татар дәүләт драма һәм комедия театры оркестрының сәнгать җитәкчесе һәм баш дирижеры Ильяс Камал III «Партитура» Бөтенроссия яшь композиторлар конкурсында җиңү яулады.
«Опера» номинациясендә композиторның «Урал бөркетләре» дип исемләнгән башкорт телендәге операсы иң яхшысы дип табылды.
Искәртеп узыйк, 2024 елда «Партитура» конкурсына гаризалар рекордлы санда килгән. Россия һәм чит ил композиторларыннан барлыгы 1094 әсәр кабул ителгән. Бәйге сигез номинациядә узды. Һәрберсендә җиңүчеләрне тавыш бирү юлы белән сайлап алдылар. Финалда абсолют җиңүче исеме өчен 40 музыкаль әсәр көч сынашты. Җиңүчеләрне акчалата бүләкләр көтә.
Конкурсның нәтиҗәләре кичә П.И. Чайковский исемендәге Мәскәү консерваториясе сәхнәсендә игълан ителде. Җиңүчеләрнең һәм лауреатларның әсәрләрен халык һәм атказанган артистлар җитәкчелегендәге Мәскәү дәүләт академия симфоник оркестры һәм Мәскәү консерваториясенең Камера хоры башкарды.
