Мамбет Мамакеевдин сөөгү “Ата-Бейиттеги” “Баатырлар аллеясында” жерге берилди
Мамакеев менен коштошуу зыйнаты Улуттук хирургия борборунда өттү. Ага Министрлер кабинетинин төрагасы Акылбек Жапаров баштаган жетекчилер, медицина кызматкерлери менен маркумдун жакындары катышты.
“Ата-Бейит” - КМШ өлкөлөрүнүн ичинен даректүү жана далилдер менен табылган репрессия курмандыктарынын бирден-бир көрүстөнү. “Эл душманы” жарлыгы тагылып, 1938-жылы 5-7-8-ноябрь күндөрү атылгандардын арасында Төрөкул Айтматов, Иманалы Айдарбеков, Баялы Исакеев, Касым Тыныстанов баштаган интеллигенциянын 137 өкүлү болгон. Маркумдардын сөөгү 1991-жылы 30-августта жаңы негизделген “Ата Бейит” көрүстөнүнө арууланып кайра коюлган. Эртеси күнү Жогорку Кеңеш Кыргызстандын эгемендигин жарыялаган.
Улуттук тарыхый мемориалдык комплекс Бишкектен 30 чакырым жерде Чүйдүн Аламүдүн районунда жайгашкан. Белгилүү жазуучу Чыңгыз Айтматовдун, 2010-жылдагы ыңкылапта курман болгондордун сөөгү да “Ата-Бейитте” жерге берилген.
Мамбет Мамакеев 24-ноябрда 98 жаш курагында дүйнөдөн кайтты. Белгилүү хирург, коомдук ишмер Мамакеев 2020-жылы дүйнөдө өз кесибинде эң узак иштеген адис катары рекорд коюп, Гиннестин рекорддор китебинин дипломун алган. 2020-жылдын 29-февралындагы эсеп боюнча анын хирургдук карьерасы 67 жыл 181 күндү түзгөн.
Мамакеев 1927-жылы 1-октябрда Ысык-Көл облусуна караштуу Ак-Суу районундагы Кереге-Таш айылында туулган. Иш тажрыйбасында 30 миңдей операция жасаган.
Мамакеевдин аты Кыргызстандын Улуттук хирургия борборуна берилген. Ага 2004-жылы “Кыргыз Республикасынын Баатыры” наамы ыйгарылган. (BTo)