"Жаңы күч" партиясы Бишкек шаардык кеңешинде 17 мандат алат

Борбордук шайлоо комиссиясы (БШК) 17-ноябрдагы жергиликтүү кеңештерге шайлоонун жыйынтыгы тууралуу Бишкек аймактык шайлоо комиссиясынын протоколун бекитти. Мындай чечим БШКнын 26-ноябрдагы отурумунда кабыл алынды.



Протоколго ылайык, Бишкек шаардык кеңешиндеги депутаттык мандаттардын көпчүлүк бөлүгүн "Жаңы күч" (17 мандат) жана "Эмгек" (12 мандат) партиялары алат.


"Адилет" партиясы менен "Ынтымак" партиясы 8 мандаттан, ал эми "Эл үмүтү" партиясы 6 мандат алат.



БШКнын жыйынында "Адилет" партиясынын бир талапкери каттоодон чыгарылганына байланыштуу айрым шайлоо тилкелериндеги добуш берүүнүн жыйынтыктары да жокко чыгарылганы айтылды.



17-ноябрда Кыргызстанда жергиликтүү кеңештердин - 33 шаардык кеңештин жана 231 айылдык кеңештин депутаттарын шайлоо болгон.


“Жаңы күч” партиясын шайлоого Бишкек шаардык кеңешинде буга чейинки чакырылышта төрагалык кылган Кубанычбек Конгантиев жетектеп барган. "Жаңы күчтүн" тизмесине мурда депутат болгондор, шаардын мурдагы жетекчилери, мамлекеттик кызматкерлер жана алардын балдары кирген.


Шайлоонун алдында, 13-ноябрда "Социал-демократтар" партиясынын Бишкектеги штабында тинтүү жүргүзүп, партиянын лидери Темирлан Султанбековду жана бир катар мүчөлөрүн кармап кеткен. Милиция аларга карата Кылмыш-жаза кодексинин “Шайлоочулардын добуштарын сатып алуу” беренеси боюнча кылмыш ишин козгогон. Шектүүлөр коюлган айыпты четке кагып, муну саясий басым-кысым деп баалап жатат. Темирлан Султанбеков 14-ноябрдан бери тергөө абагында ачкачылык кармоодо.






Бишкек аймактык шайлоо комиссиясы козголгон кылмыш ишин жана тергөөнүн маалыматтарына таянып, Социал-демократтар партиясын Бишкек шаардык кеңешине шайлоого катышуудан четтеткен. (ZKo)