Россия Хөкүмәтенә, бәяләмә бирү өчен, ана капиталы күләмен квартал саен индексацияләргә тәкъдим итә торган закон проектын тапшырдылар. «Баласы булган гаиләләргә дәүләт ярдәме күрсәтүдә өстәмә чаралар турында»гы законга төзәтмәләр кертергә телиләр. Бу хакта ТАСС агентлыгы хәбәр итә.
Закон проекты инициаторлары ачыклык керткәнчә, хәзерге вакытта ана капиталы күләме елына бер тапкыр индексацияләнә, шуңа күрә дәүләт күчерергә тиешле сумма товар һәм хезмәтләргә куллану бәяләре үсү темпларына җавап бирми, ягъни үзенең сатып алу сәләтен югалта. Ана капиталының «бәясе төшү» елның өченче һәм дүртенче кварталларында аеруча нык сизелә, ди документны әзерләүчеләр.
Авторлар шулай ук соңгы вакытта Россиядә күчемсез милек бәясе генә түгел, ипотека һ.б. займнар буенча ставкалар да артуын билгеләп үтте. Үз чиратында, ана капиталының максаты – гаиләләргә ярдәм күрсәтү һәм туучылар санын стимуллаштыру, әмма бәяләр арту сәбәпле, әлеге төр ярдәмнең нәтиҗәлелеге югала, дип искәртә алар.
Шуңа бәйле рәвештә, инициаторлар ана капиталы күләмен квартал саен арттырырга тәкъдим итте. Мондый чара товар һәм хезмәтләргә бәяләр артуны үз вакытында исәпкә алырга, шулай ук ана капиталының сатып алу сәләтен ел дәвамында сакларга ярдәм итәчәк.
