Пакистан Куррамдагы диний топтордун кагылышуусу убактылуу токтогонун билдирди
Аталган провинциянын маалымат министри Мохаммад Али Саиф 24-ноябрда журналисттерге айткандай, провинциянын Куррам районундагы шийи жана сунни мусулмандарынын лидерлери кагылышууларды жети күнгө токтото турууга макул болушту. Бул мөөнөт ичинде эки тарапты элдештирүү боюнча сүйлөшүүлөр жүрө турганы кабарланды.
Пакистандын түндүк-батышындагы бул райондо үч күндөн берки кандуу кагылышуулардан 80ден ашуун адам өлдү. Дагы 150дөй киши жаракат алды.
Буга 21-ноябрда шийилер бараткан автоунаага белгисиз куралчан адамдар ок атып, андан кеминде 38 кишинин каза тапканы себеп болгон. Бул чабуул жана райондогу удаалаш кандуу кагылышуулар үчүн эч бир топ жоопкерчиликти ала элек.
Полициянын маалыматына ылайык, үч күн ичинде куралчан адамдар үйлөрдү, дүкөндөрдү жана өкмөттүк имараттары өрттөгөн учурлар болду. Кризисти жөнгө салуу үчүн өкмөттүк делегация аймакка барган.
Reuters жаңылыктар агенттиги жазгандай, Пакистандын Ооганстан менен чек арасына жакын жайгашкан Куррам районунда суннилер менен шийилердин ортосунда мындай араздашуулар жер талаш сыяктуу маселелерден улам утур-утур катталып келет.