Халыкара галәм станциясе бортындагы Роскосмос космонавтлары Алексей Овчинин, Иван Вагнер һәм Александр Горбунов барлык аналарны Әниләр көне белән тәбрик итте. Котлау видеосын Гаилә елының оештыру комитеты тараткан.
«Сезнең кайгыртуыгыз безне иң салкын көннәрдә җылыта һәм теләсә нинди кыенлыкларны җиңеп чыгарга ярдәм итә», - дип искәртте Алексей Овчинин.
«Сезнең ярдәмегез, нәфислегегез һәм зирәклегегез дөньябызны яктырак һәм яхшырак итә. Ана мәхәббәте – безне терелтергә һәм рухландырырга сәләтле бөек көч ул», - диде Иван Вагнер.
«Иң кыйммәтле бүләк – аналарча кайгыртуның кадерен белегез һәм аны саклагыз», - диде, үз чиратында, Александр Горбунов.
Шул рәвешле, космонавтлар «Әниләр – безнең йолдызлар» Бөтенроссия котлау флешмобына кушылды, аның финалы 27 ноябрьдә була. Чара «Миңа йолдыз бүләк ит» акциясе кысаларында оештырылган.
Акция Россиянең барлык төбәкләрендә уза: үзәк урамнарда «Әниеңне котла – аңа йолдыз бүләк ит» дигән открытка-баннерлар урнаштырылган. Оештыру комитеты мәгълүматлары буенча, аларны 30 миллионнан артык кеше күргән. Флешмобны зур компанияләр һәм финанс оешмалары да хуплады.
