Марат Әхмәтов 2025 елда барлыкка киләчәк закон чыгару инициативалары турында сөйләде

Татарстан парламентарийларына Россия Дәүләт Думасы депутатлары белән 2025 елда берьюлы берничә закон чыгару инициативасын эшләргә туры киләчәк. Бу эш Татарстан Рәисе Рөстәм Миңнехановның Дәүләт Советына Юлламасын гамәлгә ашыру буенча киләсе елга чаралар планына кертелгән. План бүген парламент президиумы утырышында расланды, дип яза «Татар-информ».

«Быел Татарстан Рәисе Юлламасында республика парламентына аерым көнүзәк мәсьәләләре турында закон чыгару инициативаларын эшләү буенча конкрет йөкләмәләр бирде», - дип сөйләде ТР Дәүләт Советы Рәисе урынбасары Марат Әхмәтов.

Сүз балигъ булмаганнарны хокукка каршы эшчәнлеккә җәлеп иткән өчен җаваплылыкны катгыйландыру һәм эчке эшләр органнары хезмәткәрләренә матди ярдәм күрсәтү буенча закон чыгару инициативалары турында бара.

Моннан тыш, чит ил кешеләренең яки гражданлыгы булмаган затларның Россиядә булу режимын тәэмин итү өлешендә һәм рекрутинг агентлыклары (алар аша эшкә урнашалар) эшчәнлеген регламентлау өчен административ җаваплылыкны көчәйтү буенча, шулай ук хезмәт килешүе шартларын бозган өчен чит ил гражданины патентын гамәлдән чыгару турында инициативалар барлыкка килергә тиеш.

Әхмәтов сүзләренчә, Миңнеханов Юлламасының 37 тезисы буенча барлыгы 64 төп чара планлаштырылган. «Чаралар планында якын киләчәктә Татарстан Республикасы Рәисе билгеләгән төп өстенлекләр, төп максатлар һәм бурычлар чагылдырылган. Безгә аларны киләсе елда гамәлгә ашырырга кирәк булачак», - диде ул.

Аерым алганда, күп кенә чаралар махсус хәрби операциядә катнашучыларга һәм аларның гаиләләренә, шулай ук Россиянең яңа төбәкләреннән килеп, Татарстанда вакытлыча яшәүчеләргә ярдәм күрсәтүгә бәйле.