22-ноябрда Бишкектин Төмөнкү жал кичи районундагы Псковская көчөсү №71 дарегинде жайгашкан гараж кооперативинин жерин бошотууда чыр чыкты. Бул тууралуу Бишкек мэриясынын басма сөз кызматы кабарлады.
Маалыматка ылайык, гараждын ээлери мэриянын Жерди пайдаланууну контролдоо башкармалыгынын кызматкерлерине бензин чачып, “Тазалык” муниципалдык ишканасынын кызматтык автоунаасы жана атайын техникасы да жабыркаган. Мэрия буга чейин бул объектилер буздурула турганы боюнча алардын ээлерине түшүндүрүү иштери жүргүзүлгөнүн кабарлады.
Окуя болгон жерге укук коргоо органдарынын кызматкерлери да барып, иштеп жатат.
Мэриянын муниципалдык жерде жайгашкан деген менчик гараждарды алуу аракети алардын ээлеринин нааразылыгына туш болуп келе жатат. Гараж ээлери кооперативге өткөн кылымдын жетимишинчи жылдарынан бери мүчө экенин, мүчөлүк акысын калтырбай төлөп жүрүшкөнүн, шаар башкармалыгынын аракети мыйзамсыз экенин айтып, нааразылык билдирип келет.
Мэрия Кыргызстандын “Жер кодексине” ылайык жеке же мамлекеттик менчик катары расмий катталбаган жер тилкелеринин баары муниципалдык менчик болуп эсептелерин эскерткен. (BTo)
