Әлмәт татар дәүләт драма театры Омск өлкәсенең Тара шәһәрендә узучы театр фестиваленә килгәч, биредә яшәүче татарлар белән очрашкан.
«Милләттәшләребез белән очрашканда искиткеч хисләр кичердек. Монда татарлар бик актив икән. Безне шундый якын итеп, әзерләнеп, милли киемнәрдә татар җырлары белән каршы алдылар», дип кичерешләре белән уртаклаша Әлмәт театры директоры Фәридә Исмәгыйлева.
Татарларның «Нур» мәдәни үзәге М. Ульянов исемендәге заманча мәдәни үсеш үзәгендә урнашкан. Милли үзәкнең җитәкчесе - Гөлшат Сатышева. Биредә музей почмаклары, китап күргәзмәләре бар. «Нур» исемле ансамбль эшли. Балалар өчен дә төркемнәр бар.
«Безнең белән очрашуда Фәридә Курманова моңарчы бер дә ишетелмәгән җыр башкарды. Без елап тыңладык. Соңыннан Тара татарлары турында китап бүләк иттеләр. Биредәге татарлар Татарстанга һәм Рәис Рөстәм Миңнехановка рәхмәтле: су басу афәтенә эләгүчеләргә Татарстаннан йөк машиналары белән олау-олау кирәк-яраклар китергәннәр», дип сөйли театр директоры.
Фәридә Исмәгыйлева бу төбәктә иҗат проектлары өчен материаллар күп булуын ассызыклый. Соңгы вакытта бу якларга татар концертлары белән килүчеләр дә юк дәрәҗәсендә икән. «Без бу очрашудан гастрольләр, уртак проектлар турында уйлар белән таралыштык», ди ул.
Тарада 3 меңнән артык татар яши. Җирле татарлар белән бергә төбәктә Казан, Пермь, Түбән Новгород татарлары да гомер кичерә. Тара татарлары дин һәм җәмәгать эшлеклесе, Япониядә 9 мәчет ачкан танылган якташлары Рәшит Ибраһимов турында горурланып сөйлиләр.
Әлмәт театры Тара шәһәрендә узучы «Сотоварищи» VI бөтенроссия театр фестиваленә «Дөм» спектаклен алып килгән. М. Ульянов исемендәге Омск дәүләт Себер драма театры баш режиссеры Константин Рехтин кунаклар өчен үзе Тара буйлап экскурсия уздырган, легендар артист Михаил Ульянов, төбәкнең 18 йөздә булган канлы вакыйгалары, Сталин лагерьлары турында сөйләгән.
