Татарстан Рәисе Рөстәм Миңнеханов Россия юстиция министрының беренче урынбасары Евгений Забарчук һәм РФ юстиция министры урынбасары Олег Свириденко белән очрашты. Бу хакта республика җитәкчесенең матбугат хезмәте хәбәр итә.
ТР Хөкүмәте йортында узган әңгәмә вакытында Татарстан Республикасы һәм Россия Юстиция министрлыгы арасындагы хезмәттәшлекне үстерү мәсьәләләре хакында фикер алыштылар.
Моннан тыш, суд экспертизасы төбәк үзәгенең яңа бинасын төзү буенча «Юстиция кварталы» проектын алга таба гамәлгә ашыру мәсьәләсе дә кузгатылды.
Татарстан Рәисе Рөстәм Миңнеханов һәм Россия юстиция министры Константин Чуйченко 2022 елның августында Казанда «Юстиция кварталы»н ачкан иде.
Әлеге административ биналар комплексында юридик һәм хокукый ярдәм үзәкләре, Гражданлык инициативаларын үстерүгә ярдәм күрсәтү үзәге, РФ Юстиция министрлыгының ТР буенча идарәсе урнашкан. Шулай ук Татарстан Дәүләт юридик бюросы да монда күчте.
