Жалал-Абад облусунун Аксы районундагы Жол-Сай айылынын Мазар тилкесинде жер көчтү. Бул тууралуу Өзгөчө кырдаалдар министрлиги (ӨКМ) 21-ноябрда маалымдады.
Маалыматка ылайык, жер көчкүнүн көлөмү болжол менен 600 метр куб. Автоунаа жолуна чейин жетип, турак жайларга, адамдарга, мал-мүлккө зыяны тийген эмес.
"Тийиштүү тактоо иштерин жүргүзүү үчүн министрликтин Жалал-Абад облустук башкармалыгынын Аксы райондук өзгөчө кырдаалдар бөлүмүнөн ыкчам топ, өзгөчө кырдаалдарга мониторинг жүргүзүү жана божомолдоо департаментинен адис жер көчкөн аймакка жиберилди", - деп жазылган маалыматта.
ӨКМдин маалыматында, Кыргызстанда 3817 үй-бүлө жер көчкү коркунучу бар аймактарда жашап жатышат. Анын ичинде 2396 үй-бүлө Ош облусунда.
Кыргызстанда жер көчкүлөрдүн 93% Ош жана Жалал-Абад облустарына тиешелүү. Бул аймактарда адам өлүмү менен коштолгон жер көчкүлөр бир нече жолу катталган.
2003-жылы Өзгөндө жер көчкү бир айылды басып калып, 40 адам набыт болгон. 2009-жылы Аксыда жүргөн жер көчкүдө Райкомол айылынын 16 тургуну көз жумган, анын 11и балдар болчу.
2017-жылы жер көчкү Өзгөн районунун Зергер айыл аймагындагы Аюу-Сай айылында жети үйдү басып, 24 киши анын алдында калган. Беш күн бою жүргүзүлгөн издөө, казуу иштеринде сегиз кишинин сөөгү табылган. (ZKo)
