Октябрь нәтиҗәләре буенча Татарстанда еллык инфляция 8,32 процент тәшкил иткән. 2023 елның декабреннән куллану бәяләре – 6,8 процентка, ә 2024 елның сентябреннән 0,76 процентка арткан, диелә Татарстанстат мәгълүматларында.
2023 елның октябреннән товар бәяләре – 6,82 процентка, 2024 ел башыннан – 5,19 процентка, хезмәтләргә бәя 12,6 һәм 11,41 процентка арткан.
Җимеш-яшелчә продукциясеннән тыш, азык-төлек бер ел эчендә – 9 процентка, 2024 елның 10 аенда – 7,35 процентка, җимеш-яшелчә продукциясе – 10,12 һәм 8,41 процентка, азык-төлек булмаган товарлар 4,66 һәм 4,04 процентка кыйммәтләнгән.
Аналитикларның мәгълүматларыннан күренгәнчә, куллану бәяләренең база индексы 2023 елның октябреннән – 8,46 процентка, декабрьдән 7,21 процентка үзгәргән.
Искәртеп узабыз, сентябрьдә Татарстанда еллык инфляция 8,71 процент тәшкил итте. Шул рәвешле, октябрьдә ул берникадәр акрынайды.
