Татарстан Юстиция министрлыгы Биләр археологик һәйкәлләре комплексы составына кергән объектларның чикләре турындагы боерыкларны теркәде. Бу хакта ТР Мәдәни мирас объектларын саклау комитеты матбугат хезмәте хәбәр итә.
Биредә «I Биләр җирлеге », «IV Биләр авыллыгы», «Изге чишмә» шәһәрлеге», «Изге чишмә» изге урыны», «II Николаев-Баран шәһәрлеге», «I Николаев-Баран авыллыгы», «II Николаев-Баран авыллыгы», «III Николаев-Баран авыллыгы» һәм «Николаев-Баран каберлеге» кебек археологик мирас объектлары хакында сүз бара.
Әлеге һәйкәлләрнең барысы да Биләр шәһәрлеген – федераль әһәмияткә ия мәдәни мирас объектын, шулай ук якын-тирәдәге X–XIII йөз Идел буе Болгар дәүләтенең сәяси һәм икътисади үзәге – Биләр белән бәйле археологик һәйкәлләрне үз эченә алган Биләр округының бер өлеше булып тора.
Биләр шәһәрлеге, ныгытмаларны да кертеп, 6 миллион 202 мең квадрат метрга якын мәйданны били. Шәһәр диварлары эчендәге торак зона якынча 4 миллион 900 мең квадрат метр тәшкил итә. Шәһәрнең әйләнә-тирәсендә борынгы шәһәр яны бистәләре урнашкан, алар кирмән диварларына тоташкан. Биләр археологик комплексының гомуми мәйданы якын-тирәдәге һәйкәлләр белән бергә 8 миллион квадрат метрга җитә һәм бу аның урта гасырдагы иң зур шәһәрләрнең булуы хакында сөйли.
Тикшеренү эшләре һәм чикләрне теркәү өчен документлар әзерләү мәдәни мирасны саклау буенча дәүләт программасы кысаларында башкарылган, дип искәрттеләр комитетта.
