Россиядә бер атнада ак майга бәя 1,4 процентка арткан

Россиядә 29 октябрь – 5 ноябрь атнасында ак майга бәя 1,4 процентка арткан. Бу хакта Росстат мәгълүматларына сылтама белән РИА Новости яза.

Россия Премьер-министры Дмитрий Патрушев эчке базарда ак майга бәяләрне тотрыклырак итү максатыннан кайбер йөкләмәләр биргән иде. Авыл хуҗалыгы министрлыгында Россия базары ак май белән тулысынча тәэмин ителгән, ә җитештерүчеләр авыл хуҗалыгы министрлыгына яки «Союзмолоко»га аны җитештерүне туктату яки киметү турында хәбәр итмәгән, дип белдерделәр.

«2024 елның 29 октябреннән 5 ноябренә кадәр бәяләр ак майга +1,4 процентка, каймакка +1,0 процентка, пастеризацияләнгән сөткә +0,9 процентка, стерильләштерелгән сөт һәм туңдырылган балыкка +0,8 процентка, каты, ярым каты һәм йомшак сырларга, тарыга +0,7 процентка, тавык йомыркасына һәм маргаринга +0,6 процентка, эремчеккә +0,5 процентка, пешкән казылыкларга, арыш һәм бодай ипиләренә, көнбагыш мае, балалар туклануы өчен яшелчә консервалары һәм печеньега +0,4 процентка үзгәрде», – диелә Росстат материалларында.

Бодай оны, токмач, ашханә, кафе һәмкапкалап алу урыннарында (оешмалардагы ашханәләрдән кала) төшке 0,3 процентка, бозау ите һәм аш тозы 0,2 процентка, сарык, дуңгыз ите, макарон эшләнмәләре, кара чәй һәм аракы 0,1 процентка кыйммәтләнде.

Росстат мәгълүматлары буенча, 29 октябрьдән 5 ноябрьгә кадәр яшелчәләргә бәя уртача 4 процентка арткан. Шул исәптән кыяр 8,6, башлы суган 6,3, бәрәңге 6,1, помидор 5,1, чөгендер 4,3, кәбестә 4, кишер 2,3, банан 1,9, алма 0,8 процентка кыйммәтләнгән.

Балалар туклануы өчен коры сөтле катнашмаларга һәм карабодай ярмасына бәя 0,5, тавык итенә 0,2, шикәр комына, дөгегә, ит һәм балалар туклануы өчен җиләк-җимеш консерваларына 0,1 процентка төшкән.