Свердловск өлкәсе ата-аналар комитеты башлыгы Людмила Золотницкая квадробика белән шөгыльләнүче балаларны мәктәпкә кертмәскә чакырды. Бу хакта Ura.ru сайты яза.
Аның фикеренчә, квадробика белән шөгыльләнүче мәктәп укучылары башка балаларга куркыныч тудырырга мөмкин.
«Бездән күптән түгел: «Квадроберларны мәктәпкә кертмәделәр, нинди тәртипсезлек бу», - дип сорадылар. Мин аларга дөрес эшләгәннәр, алар дүрт аякта йөри, бу башкалар өчен дә, үзләре өчен дә куркыныч, гомумән мәктәптә үз-үзеңне тоту кагыйдәләре бар, аларны үтәргә кирәк, дип җавап бирдем», - диде Золотницкая.
Аның сүзләренчә, әгәр бала хайваннарга хас колаклар киеп йөрсә, моның бернинди начарлыгы да юк. Әгәр инде бу хәрәкәткә тулысынча кереп китә һәм әйләнә-тирәдәгеләргә уңайсызлык тудыра икән, бу чып-чын проблемага әверелә.
Элегрәк Дәүләт Думасындагы мәдәният комитеты рәисенең беренче урынбасары Денис Михайлов парламентның түбән палатасында квадроберлар субкультурасына контроль урнаштырачак закон проекты әзерләнүе хакында хәбәр иткән иде. Дәүләт Думасына Татарстаннан сайланган Айрат Фәррахов квадробингны закон нигезендә тыюга каршы чыкты. Ул үз позициясен әлеге хәрәкәт Хөкүмәт тарафыннан зур игътибарга лаек түгеллеге белән аңлатты. Моннан тыш, Дәүләт Думасының гаиләне саклау комитеты рәисе Нина Останина квадроберларны мыскыл итәргә тәкъдим итте.
