Марат Әхмәтов Казахстанның Абай өлкәсе акиме Нурлан Уранхаев белән очрашты
Бүген ТР Дәүләт Советы Рәисе урынбасары Марат Әхмәтов, Казахстан Республикасының Абай өлкәсе акиме Нурлан Уранхаев һәм өлкә Мәслихәте (парламенты) рәисе Куаныш Сөләйманов мәдәниятара диалог һәм парламентара элемтәләрне киңәйтү мәсьәләләре хакында фикер алышты. Бу хакта республика парламентының матбугат хезмәте хәбәр итә.
Казахстан делегациясе Казанда Абай өлкәсе мәдәнияте көннәренә багышланган тантаналарда катнашу өчен Татарстан башкаласына эш сәфәре белән килде.
Әхмәтов кунакларны Татарстан Дәүләт Советы Рәисе Фәрит Мөхәммәтшин һәм парламент депутатлары исеменнән сәламләде. Ул билгеләп үткәнчә, әлеге сәфәр Россия-Казахстан мөнәсәбәтләре кысаларында төбәкләр хезмәттәшлеге өчен яңа мөмкинлекләр ача.
«Соңгы елларда Татарстан Республикасы белән Абай өлкәсе арасындагы хезмәттәшлек ике яклы сәфәрләр белән баетыла. Казахстан безнең республика өчен – аерым партнер», - дип белдерде ТР Дәүләт Советы Рәисе урынбасары.
Ул ТР Дәүләт Советының Казахстан парламенты һәм акиматларның вәкиллекле органнары белән парламентара элемтәләре үсүенә игътибар юнәлтте.
Абай өлкәсе вәкилләрен Татарстан Дәүләт Советы, парламент комитетлары, фракцияләр, комиссияләр, депутат төркемнәре һәм берләшмәләре эшчәнлеге белән таныштырдылар.
Әхмәтов шул исәптән Татарстан һәм Казахстан халыклары ассамблеялары линиясе буенча элемтәләрнең киңәюен билгеләп үтте һәм Абай өлкәсендә татар җәмгыятенә ярдәм күрсәткән өчен ил Хөкүмәтенә рәхмәт белдерде. Тулаем алганда, Казахстанда 220 меңгә якын татар яши, ул чит илләрдә сан ягыннан икенче урындагы татар җәмгыяте.