Депутат Акаев: АКШда бийликке ким келбесин, башкы баалуулуктар сакталат

Жогорку Кеңештеги “Альянс” фракциясынын лидери Жанарбек Акаев Америка Кошмо Штаттарындагы президенттик шайлоонун алдын ала жыйынтыгында Дональд Трамптын алдыга чыгышы жана бул Кыргызстан менен АКШнын алакасына кандай таасир этери тууралуу пикирин “Азаттыкка” бөлүштү.


“АКШда бийлик алмашканда баалуулуктар түп тамырынан өзгөрүп кетет деп айтууга болбойт. Анткени бул өлкөдө система иштейт, ал бир адамдан гана көз каранды эмес. Кыргызстанда бир адам бийликке келип башкаруу системасын, Баш мыйзамды өзгөртүп салышы мүмкүн. Бирок АКШда мамлекеттик институттар мурдагыдай эле иштеп, демократия, адам укуктары, сөз эркиндиги сыяктуу башкы баалуулуктар ошол боюнча сакталып калат. Кыргызстандык айрым жарандар Трамп шайлоодон уткандан кийин мигранттарга чектөөлөр болот, виза алуу татаалдашат деп чочулашат. Менин пикиримде, бул маселелерге эч кандай таасир этпейт”, - деди ал.


АКШда президенттик шайлоого Республикачылар партиясынан катышкан талапкер, өлкөнүн мурдагы президенти Дональд Трамп Флорида штатында шайлоочуларынын алдында сүйлөгөн сөзүндө шайлоодо утканын жарыялады.


Кыргызстан менен АКШнын ортосундагы кызматташтык жөнүндө макулдашууга 1993-жылы 19-майда Вашингтондо кол коюлган. Стратегиялык документти кыргыз өкмөтү 2015-жылы 21-июлда бир тараптуу денонсациялаган.


Жаңы макулдашуу тууралуу сөз 2017-жылдан бери айтылып келет. Бирок азырынча ага кол коюла элек.


АКШ 4-марттан тарта Кыргызстандын жарандарына берилүүчү туристтик жана ишкерлик визанын мөөнөтүн беш жылдан 10 жылга узарткан.



Кыргызстандын Эмгек, социалдык камсыздоо жана миграция министрлиги быйыл февралга карата АКШда 36 миң кыргызстандык жашап, иштеп жатканын билдирген. (BTo)